ہراسانی کیس: ڈی جی پی ایچ اے نے خاتون افسر کو نوکری سے نکال دیا

ملتان ( گردو پیش رپورٹ ) پارکس اینڈہارٹیکلچر اتھارٹی (پی ایچ اے )کی سابق خاتون افسراور پی ایچ ڈی سکالر سیدہ منیبہ نے ڈائریکٹرجنرل پی ایچ اے ملتان آصف رﺅف خان سواتی کے خلاف درخواست صوبائی محتسب پنجاب کو بھیج دی ہے ۔
درخواست میں آصف رﺅف پرالزام عائد کیاگیاہے کہ وہ انہیں ہراساں کرتے رہے اورانتقامی کارروائی کرتے ہوئے انہیں ملازمت سے بھی برطرف کرادیا۔انہوں نے درخواست میں موقف اختیارکیاہے کہ جب ان کی ترقی ہوئی توانہیں پرسنل سٹاف افسر ڈائریکٹرجنرل پی ایچ اے تعینات کیاگیاجس کے بعد رﺅف خان نے مجھے ہراساں کرناشروع کردیااورمیرے خلاف انتقامی کارروائیاں شروع کردیں ۔میں نے ملازمت سے چھٹیاں بھی لیں لیکن میری چھٹیاں منسوخ کردی گئیں ۔
دریں اثناءزندگی کے مختلف شعبوں سے تعلق رکھنے والے افرادنے ڈائریکٹرجنرل پی ایچ اے ملتان آصف رﺅف سواتی کو ان کے عہدے سے برطرف کرنے اوران کے خلاف انضباطی کارروائی کامطالبہ کیاہے۔سماجی تنظیموں کی جانب سے کہاگیاہے کہ پی ایچ اے کے ڈائریکٹرجنرل نے محکمے کی خاتون افسر سیدہ منیبہ علی کوہراساں کرنے کی کوشش کی ۔سرائیکستان قومی کونسل کے چیئرمین ظہوراحمد دھریجہ اورسخن ورفورم کے عہدیداروں رضی الدین رضی ،شاکر حسین شاکر کی جانب سے مطالبہ کیاگیاہے کہ بداخلاقی کے مرتکب ایسے افسروں کو ان کے عہدوں سے ہٹایاجائے بصورت دیگر عوام سڑکوں پرآنے سے بھی گریز نہیں کرے گی۔