پشاور:ویسٹ انڈیز کو 2 مرتبہ ورلڈ ٹی ٹوئنٹی جتوانے والے ڈیرن سیمی پاکستان سپر لیگ سیزن 9 میں بھی پشاور زلمی فیملی کا حصہ بن گئے۔
پاکستان سپر لیگ ( پی ایس ایل) سیزن 9 کے لیے ویسٹ انڈیز کے سابق کپتان ڈیرن سیمی کو پشاور زلمی کا ہیڈ کوچ مقرر کردیا گیا ۔
پشاور زلمی کے چیئرمین جاوید آفریدی نے کہا ہے کہ وہ ڈیرن سیمی کو پاکستان سپر لیگ سیزن 9 کے لیے زلمی فیملی میں خوش آمدید کہتے ہیں ، پاکستان سپر لیگ کی ابتدا ہی سے ڈیرن سیمی پشاور زلمی ٹیم اور فیملی کا اہم ترین حصہ ہیں اور پاکستان اور زلمی فینز کے پسندیدہ ہیں۔
انہوں نے کہا کہ ڈیرن سیمی نے بطور کپتان پشاور زلمی کو پی ایس ایل 2 جتوانے کے علاوہ بطور کوچ بھی پشاور زلمی کی فتوحات میں اپنا اہم کردار ادا کیا ہے۔
دوسری جانب ڈیرن سیمی نے اپنے پیغام میں کہا ہے کہ پاکستان سپر لیگ سیزن 9 کے لیے پشاور زلمی فیملی کا حصہ بننے پر خوشی ہے ، پشاور زلمی ٹیم میرے لیے ایک فیملی کی طرح ہے ، بطور کپتان پشاور زلمی کے ساتھ پی ایس ایل 2 کا ٹائٹل جیتنا یادگار لمحات ہیں ۔
انہوں نے کہا کہ پی ایس ایل سیزن 9 میں ایک بار پھر پشاور زلمی کو ٹرافی جتوانے کی کوشش کروں گا۔
(بشکریہ: جیو نیوز)
