عمران خان کی قبل از وقت انتخابات کی خواہش نے پاکستان کو آئینی بحران میں دھکیل دیا ہے: بلوم برگ

امریکی جریدے بلوم برگ کی رپورٹ میں کہا گیا ہے کہ چیئرمین پاکستان تحریک انصاف عمران خان کی قبل از وقت انتخابات کی خواہش نے پاکستان کو آئینی بحران میں دھکیل دیا ہے۔
بلوم برگ کی رپورٹ میں یہ بھی کہا گیا ہے کہ عمران خان تیزی سے پاکستان کو بحران اور انتشار کی جانب دھکیل رہے ہیں، بحران کے نتیجے میں پاکستان میں جمہوری عمل کے مستقبل کے بارے میں تشویش بڑھ گئی ہے۔
رپورٹ میں کہا گیا ہے کہ چیف جسٹس پاکستان اور وفاقی حکومت کے درمیان تصادم کی صورت حال پیدا ہو چکی ہے، چیف جسٹس پاکستان عمر عطا بندیال معاملے میں مرکزی کردار بن چکے ہیں۔
امریکی جریدے کی رپورٹ میں کہا گیا ہے کہ پاکستان کی سپریم کورٹ میں تقسیم نظر آ رہی ہے، تشدد کی فضا قائم ہونے کا بھی خدشہ ہے، عمران خان ملٹری اسٹیبلشمنٹ اور امریکا سے دوبارہ تعلقات استوار کرنے کی کوشش کر رہے ہیں۔
خیال رہے کہ سپریم کورٹ نے پنجاب میں 14 مئی کو الیکشن کرانے کا حکم دے رکھا ہے اور چیئرمین پی ٹی آئی بھی اس مؤقف پر اڑ گئے ہیں کہ اعلیٰ عدلیہ نے جو تاریخ دی ہے ہم اس سے آگے نہیں جائیں گے۔
دوسری جانب وفاقی حکومت کا مؤقف ہے کہ انتخابات اپنے مقررہ وقت پر ہی ہونے چاہئیں اور پورے پاکستان میں ایک ہی وقت میں انتخابات ہونے چاہئیں کیونکہ اگر ایک صوبے میں الیکشن ہوئے تو کوئی بھی اسے قبول نہیں کرے گا۔
(بشکریہ: جیو نیوز)