ملتان: معروف براڈکاسٹر اورسابق اسٹیشن ڈائریکٹر آصفہ منیر سوموارکے روز انتقال کرگئیں۔ان کی عمر55برس تھی اور وہ گزشتہ چند ماہ سے گردوں کے عارضہ میں مبتلا تھیں ۔
آصفہ منیر نے ریڈیو ملتان سے وابستگی کے دوران بہت سے یادگار ڈرامے اورفیچرز ریکارڈ کیے۔ وہ خواتین کے پروگرام کی پروڈیوسر اور میزبان بھی رہیں۔ آصفہ منیر نے چند روزکے لیے اسٹیشن ڈائریکٹر کے فرائض بھی انجام دیئے۔ان کے پسماندگان میں ان کے شوہر منیر احمد اور لے پالک بیٹی شامل ہیں۔
ملتان کے ادبی و ثقافتی حلقوں نے ان کے انتقال پرگہرے دکھ اورصدمے کااظہار کیا ہے۔سابق کنٹرولر پروگرامز آصف کھیتران نے کہاکہ وہ ایک فرض شناس کارکن تھیں۔ ریڈیو پاکستان کے لیے ان کی خدمات کو کبھی فراموش نہیں کیاجائے گا۔ شاکر حسین شاکر نے کہاکہ وہ ریڈیو ملتان کااثاثہ تھیں۔ایف ایم 101کے انچارج اور سینئر براڈ کاسٹر ریاض میلسی نے کہا کہ یہ ریڈیو پاکستان کا ناقابل تلافی نقصان ہے ۔انہوں نے دیگر پروگراموں کے علاوہ ایک طویل عرصے تک مذہبی پروگراموں کی پروڈیوسر کی حیثیت سے بھی فرائض انجام دیئے۔وہ خوش اخلاق اور ملنسار تھیں۔
سجاد کھوکھر نے اپنے تعزیتی پیغام میں کہاکہ ان کی خدمات کوفراموش نہیں کیا جائے گا۔ سینئر براڈ کاسٹر ساجد حسن درانی نے کہاکہ ریڈیو ملتان کے کارکن انہیں ہمیشہ یاد رکھیں گے۔ سینئر براڈ کاسٹر سرفراز خان نے کہاکہ ہم ان کے درجات کی بلندی کے لیے دعاگوہیں۔
