مُلتان : تحریکِ پاکستان اور تحریکِ آزادی کشمیر کے سر گرم رہنما اور 1953 کی تحریکِ ختمِ نبوت کے سربراہ علامہ سید ابوالحسنات قادری کا یومِ وفات 13 فروری کو ملک بھر میں منایا جا رہا ہے علامہ سید ابوالحسنات قادری 1896 میں ریاست الور (بھارت) میں پیدا ہوئے – دینی عُلوم حضرت امام احمد رضا بریلوی اور اپنے والد ماجد مولانا سید دیدار علی شاہ سے حاصل کیے – 1926 میں لاہور آۓ اور تاریخی مسجد وزیر خان میں 35 برس تک خطابت کے فرائض سر انجام دئیے ۔
علامہ سید ابوالحسنات قادری نے تحریکِ پاکستان میں برصغیر کے طول و عرض میں دورے کیے اور تحریکِ پاکستان کی حمایت میں بنارس میں منعقدہ آل انڈیا سُنی کانفرنس کو کامیاب بنانے کے لیے بھرپور جدو جہد کی 1948 میں وہ جمعیت عُلمائے پاکستان کے پہلے مرکزی صدر منتخب ہوۓ- 1953 کی تحریکِ تحفظِ ختمِ نبوت میں تمام مکاتب فکر کے علماء نے انہیں مجلسِ عمل کا سربراہ مقرر کیا ۔ انہوں نے 1948 میں جہاد کشمیر کے حق میں متفقہ فتویٰ جاری کیا
ان کا انتقال 2 شعبان 1380 کو لاہور میں ہوا۔ اُنہیں حضرت داتا صاحب کے مزار کے احاطے میں سُپردِ خاک کیا گیا ۔ اُن کے یومِ وصال کے سلسلے میں ملک بھر میں اجتماعات ہوں گے جن میں اُن کی خدمات پر روشنی ڈالی جائے گی اور اُن کے لیے دُعاۓ مغفرت کی جاۓ گی۔
