میران شاہ: چیک پوسٹ پر ہونے والے خودکش حملے میں 3 سکیورٹی اہلکار شہید اور 3 شہری زخمی ہو گئے۔
پاک فوج کے شعبہ تعلقات عامہ کے مطابق گاڑی میں سوار خودکش بمبار کے دھماکے میں 3 سکیورٹی اہلکار شہید ہوئے، دھماکے میں 3 شہری بھی شدید زخمی ہوئے۔
آئی ایس پی آر کے مطابق شہید ہونے والوں میں نائب صوبیدار صاحب خان، نائیک محمد ابراہیم اور سپاہی جہانگیر شامل ہیں۔
شعبہ تعلقات عامہ کے مطابق خود کش بمبار سکیورٹی فورسز کی چوکی کو نشانہ بنانا چاہتا تھا، ڈیوٹی پر تعینات جوانوں نے بروقت کارروائی کر کے بڑے سانحے سے بچا لیا۔
پاک فوج کے شعبہ تعلقات عامہ کا کہنا ہے کہ سکیورٹی فورسز پاکستان سے دہشتگردی کی لعنت کے خاتمے کے لیے پُرعزم ہیں، بہادر جوانوں کی ایسی قربانیاں ہمارے عزم کو مزید مضبوط کرتی ہیں۔
ڈی پی او سلیم ریاض نے جیو نیوز کو بتایا کہ خودکش حملہ میران شاہ بنوں شاہراہ پر واقع حمید اللہ شہید چیک پوسٹ کے قریب ہوا، چیک پوسٹ پر حملے میں پولیس اہلکار محفوظ رہے جبکہ زخمیوں کو میران شاہ اسپتال منتقل کر دیا گیا ہے۔
ڈی پی او کے مطابق حملے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔
خیال رہے کہ چند روز قبل بھی میرعلی میں سکیورٹی فورسز کے کانوائے پر خودکش حملہ ہوا تھا۔
(بشکریہ:جیو نیوز)
