پنجاب اسمبلی کا رات گئے اجلاس : پرویز الٰہی پر اعتماد کے ووٹ کی قرارداد : اپوزیشن کا بائیکاٹ

لاہور : پاکستان تحریک انصاف (پی ٹی آئی) نے پرویز الہٰی کے اعتماد کے ووٹ پر رائے شماری کیلئے راتوں رات کارروائی شروع کردی، پنجاب اسمبلی میں وزیراعلیٰ پر اعتماد کے ووٹ کی قرارداد پیش کردی گئی۔
راجہ بشارت اور اسلم اقبال نے اعتماد کے ووٹ کی قرارداد پیش کی، اس موقع پر پنجاب اسمبلی میں شور شرابہ جاری رہا جبکہ کرسیاں بھی چل گئیں۔
اپوزیشن کی جانب سے پنجاب اسمبلی کے اجلاس کا بائیکاٹ کردیا گیا ہے، انہوں نے قرارداد کی کاپیاں ہوا میں اچھال دیں۔
اس سے کچھ دیر قبل وقفے کے بعد پنجاب اسمبلی کا اجلاس دوبارہ شروع ہو گیا۔ تاہم پچھلا اجلاس ملتوی کرکے آج یعنی 12جنوری کی تاریخ کو نیا اجلاس طلب کر لیا گیا۔
اجلاس میں تحریک انصاف اور اتحادی جماعتیں وزیراعلیٰ پرویز الہٰی کو اعتماد کا ووٹ دلانے کے لیے کوشاں ہیں۔
وزیر اعلیٰ چوہدری پرویز الہٰی گھنٹوں انتظار کرنے کے بعد پنجاب اسمبلی پہنچ گئے، فواد چوہدری نے کہا کہ 187 ارکان کا ہدف پورا کرلیا ہے، مزید کچھ ارکان اجلاس میں شرکت کیلئے روانہ ہو گئے ہیں۔
پنجاب اسمبلی کے اپوزیشن ارکان کا کہنا ہے کہ اسمبلی میں پرویز الہٰی کو اکثریت حاصل نہیں رہی ، ایوان کے حاضری رجسٹر کے مطابق پی ٹی آئی اور ق لیگ کے 181 ارکان نے حاضری درج کرائی ۔