ملتان:سابق گورنر پنجاب اور سینئر سیاست دان ملک غلام مصطفی کھر نے کہاہے کہ اس وقت ملک جن معاشی حالات سے گزررہاہے اس میں محب وطن قوتوں کو سیاسی مفادات سے بالاتر ہوکر اپناکرداراداکرناچاہیے تاکہ پاکستا ن کومسائل سے نکالا جاسکے۔
ان خیالات کااظہارانہوں نےسابق ایم پی اے ڈاکٹرجاوید صدیقی اور معروف سیاسی و سماجی رہنماءمنور خورشید صدیقی کے ساتھ ملاقات کے دوران کیا۔ انہوں نے کہاکہ کوئی بھی سیاسی جماعت پنجاب کے بغیر عوام میں مقبول نہیں ہوسکتی۔ پاکستان پیپلزپارٹی کی مقبولیت میں بھی بنیادی کردار پنجاب کا رہا۔ غلام مصطفی کھر نے کہاکہ میرا مختلف سیاسی جماعتوں کے ساتھ رابطہ ہے لیکن ابھی میں سیاست میں متحرک کردارادا نہیں کررہا۔ انہوں نے بتایا کہ دو سال قبل گھڑ سواری کے دوران گرنے کے باعث میری ٹانگ میں فریکچر ہوگیاتھا جس کے بعد میں نے تقریبات میں شرکت ختم کردی۔
منورخورشید صدیقی اور ڈاکٹرجاوید صدیقی نے ملک غلام مصطفی کھر سے ان کے جواں سال بیٹے عبدالرحمن کھر کے انتقال پرتعزیت کااظہار بھی کیا۔اس موقع پر سابق گورنر رفیق رجوانہ اور دیگر سیاسی شخصیات بھی موجودتھیں۔
