گورنر پنجاب عمر سرفراز چیمہ کو عہدے سے ہٹا دیا گیا : نوٹیفکیشن جاری

اسلام آباد : حکومتِ پاکستان نے گورنر پنجاب عمر سرفراز چیمہ کو اُن کے عہدے سے ہٹانے کا نوٹیفیکشن جاری کر دیا ہے۔ نئے گورنر کی تعیناتی تک پنجاب اسمبلی کے سپیکر قائم مقام گورنر کے فرائض انجام دیں گے۔
قبل ازیں صدر پاکستان ڈاکٹر عارف علوی نے گورنر پنجاب کو ہٹانے کی وزیراعظم شہباز شریف کی ایڈوائس مسترد کر دی تھی ۔
ٹوئٹر پر ایک پیغام میں صدر پاکستان عارف علوی نے کہا کہ ’گورنر پنجاب کو صدر پاکستان کی منظوری کے بغیر نہیں ہٹایا جاسکتا۔‘
صدر پاکستان کے ٹوئٹر اکاؤنٹ سے پیر کی شب جاری بیان میں مزید کہا گیا ہے ’آئین کے آرٹیکل 101 کی شق 3 کے مطابق گورنر صدر مملکت کی رضا مندی تک عہدے پر قائم رہے گا۔‘صدر پاکستان نے اس حوالے سے کہا ہے کہ ’مجھے یقین ہے گورنر کو ہٹانا غیر منصفانہ اور انصاف کے اصولوں کے خلاف ہوگا۔
انہوں نے کہا کہ ’ضروری ہے کہ موجودہ گورنر ایک صحت مند اور صاف جمہوری نظام کی حوصلہ افزائی اور فروغ کے لیے عہدے پر قائم رہیں۔‘
ٹوئٹر پر اپنے بیان میں ان کا کہنا تھا کہ ’ریاست کے سربراہ کی حیثیت سے صدر مملکت کا فرض ہے کہ وہ آئین کے آرٹیکل 41 کے مطابق پاکستان کے اتحاد کی نمائندگی کرے۔‘
( بشکریہ : بی بی سی اردو )