بتیس سال کے صحافتی کیریئر کے دوران مجھے صحافت کے جن درخشندہ ستاروں کے ساتھ کام کرنے کا اعزاز حاصل رہا ہے ان میں سے ایک محترم غضنفر علی شاہی بھی ہیں۔ فروری 1997ء میں جب مجھے نوائے وقت کے نیوز روم سے رپورٹنگ میں ٹرانسفر کیا گیا تو اس وقت شاہی صاحب میرے چیف رپورٹر تھے۔ اور اسی برس وہ مسلسل تیسری بار ملتان پریس کلب کے صدر بھی منتخب ہوئے تھے۔
پریس کلب کی سیاست میں میرا تعلق محترم عبدالجبار مفتی صاحب کے جرنلسٹس گروپ کے ساتھ تھا۔ عام خیال یہی تھا کہ شاہی صاحب اپنی رپورٹنگ سربراہی کے ذریعے میرے لیے پریشانی کا باعث بنیں گے۔۔۔ لیکن ۔۔ میرا محترم شاہی صاحب کی قیادت میں نوائے وقت کیلئے رپورٹنگ کا تجربہ یوں شاندار اور پروفیشنل رہا کہ انہوں نے مجھے بطور سپورٹس رپورٹر آگے بڑھنے میں مدد دی۔ شاہی صاحب نے ہمیشہ میری رہنمائی کی اور خبریت میں کبھی بھی اپنے کسی تعلق واسطہ کو حائل نہ ہونے دیا۔۔مجھے یاد ہے کہ ملتان پریس کلب کا صدر بننے کی ہیٹرک مکمل ہونے پر ان کے ایک دیرینہ دوست ملتان کرکٹ کلب ایم سی سی کے روح رواں ۔اس وقت کے مسلم لیگی ایم پی اے اور نامور قانون دان مولوی سلطان عالم انصاری انہیں مبارکباد دینے کے لیے پھولوں اور مٹھائی کے ٹوکرے کے ساتھ دفتر آئے ۔ اتفاق سے اس وقت مولوی صاحب کے کلب ایم سی سی کے زیراہتمام کھیلے جانیوالے آل پاکستان کرکٹ ٹورنامنٹ سے متعلق ایک سکینڈل زیر بحث تھا۔ مولوی صاحب کی خلوص بھری مبارکباد وصول کرنے اور ان کی روانگی کے بعد شاہی صاحب مجھ سے مخاطب ہوئے کہ مولوی صاحب سے میرا تعلق واسطہ اپنی جگہ لیکن آپ نے آل پاکستان کرکٹ ٹورنامنٹ سے متعلق سکینڈل کی خبر لازمی جاری کرنی ہے اور بعد میں اسی سکینڈل کے پس منظر میں محترم شاہی صاحب نے میری تحریر کردہ سپورٹس ڈائری کی بھی نوک پلک سنواری۔۔ مولوی صاحب نے شاہی صاحب سے جو بھی گلے شکوے کیے اور جہاں جہاں سے بھی ان پر دباؤ ڈلوایا یہ ایک الگ داستان ہے۔۔ لیکن شاہی صاحب نے براہ راست سارا پریشر خود برداشت کیا اور مجھے کسی دبائو کا شکار نہ ہونے دیا۔محترم شاہی صاحب جب نوائے وقت کو خیر باد کہہ کر بحیثیت چیف رپورٹر روزنامہ ایکسپریس کا حصہ بنے تو مجھے بطور سپورٹس رپورٹر ان کے ساتھ پیشہ ورانہ ذمہ داریاں نبھانے کا اعزاز حاصل رہا۔۔۔
شاہی صاحب کی ذات سے کسی کو چاہے لاکھ اختلاف رہے ہوں ۔۔ لیکن انہوں نے پیشہ ورانہ ذمہ داریوں کی انجام دہی میں ہمیشہ میری رہنمائی اور سرپرستی کی۔
