اسلام آباد: سپریم کورٹ آف پاکستان نے جہانگیر ترین گروپ کے رہنماء سلمان نعیم کی پنجاب اسمبلی کی رکنیت بحال کرتے ہوئے الیکشن کمیشن کا فیصلہ کالعدم قرار دے دیا۔
سلمان نعیم نے 2018 کے عام انتخابات میں پی پی 217 ملتان سے آزاد حیثیت میں وزیر خارجہ شاہ محمود قریشی کے مقابلے میں کامیابی حاصل کی تھی۔ 2 شناختی کارڈز رکھنے پر ان کی اسمبلی رکنیت کو چیلنج کیا گیا تھا۔الیکشن کمیشن نے ان کی رکنیت بحال کی جسے پہلے ہائی کورٹ اور پھر سپریم کورٹ میں چیلنج کیا گیا تھا۔جسٹس منیب اختر نے محفوظ شدہ فیصلہ سنایا۔ جسٹس مشیر عالم کی سربراہی میں 3 رکنی بینچ نے یہ فیصلہ محفوظ کیا تھا۔ فیصلے کے بعد سلمان نعیم نے اپنے حامیوں کے ہمراہ جہانگیر ترین سے ملاقات کی اورانہیں اپنے بھر پور تعاون کا یقین دلایا ۔ جہانگیر ترین نے ان کی کامیابی پر انہیں مبارک باد دی ۔
