ملتان ( عمران عثمانی سے ) 18 جنوری پاکستان کرکٹ ٹیم کے لئے ایک اعتبار سے اہم ہے،اس نے اسی روز آسٹریلیا کی سرزمین پرپاکستان نے تاریخ کی پہلی ٹیسٹ فتح حاصل کی۔14 جنوری 1977 کو شروع ہونے والا ٹیسٹ 18جنوری کو پاکستان کی8وکٹ کی فتح پر مکمل ہوا۔
سڈنی میں پاکستان کی فتح کے مرکزی ہیروفاسٹ بائولرز عمران خان اور سرفراز نواز تھے،دونوں نے 20 میں سے 18 وکٹیں اپنے نام کیں،ان میں بھی 12 وکٹیں عمران خان کی تھیں۔آسٹریلیا کی پہلی اننگ 211پر سمٹ گئی۔عمران خان نے 102رنز دے کر 6وکٹیں لیں۔جواب میں پاکستان نےآصف اقبال کی سنچری کی بدولت 360رنزبنائے۔149رنزکی سبقت اہم تھی،میزبان ٹیم دوسری اننگ میں بھی نہ چلی اور 180پر باہر ہوگئی،عمران خان نے اس بار 63 رنز دے کر 6وکٹیں لیں،پاکستان کو فتح کے لئے32 رنز کا ہدف ملا جو اس نے 2وکٹ پر مکمل کرلیا۔عمران خان نے میچ میں 165رنزکے عوض 12 کھلاڑی آئوٹ کئے۔
کیا ہی اتفاق تھا کہ یہ 3 میچز کی سیریز کا تیسرا ور آخری ٹیسٹ تھا،پاکستان نے اس فتح کے ساتھ ہی سیریز 1-1سے برابری پر ختم کی جو اس زمانہ کا بڑا کارنامہ تھا.
