راولپنڈی : شادی والے گھر میں آگ بھڑکنے سے دولہن سمیت 5 خواتین جھلس کر جاں بحق ہو گئیں۔ اس حوالے سے بتایا گیا کہ تھانہ صادق آباد کی حدود میں واقع گھر میں آگ بھڑک اٹھی جس کی زد میں آکر 24 سالہ دولہن ثناء سمیت 14 سے 22 سال عمروں کی 4 خواتین جاں بحق ہو گئی۔ اس حوالے سے جاں بحق ہونے والی دولہن کے والد عبدالغنی نے بتایا کہ ’مہندی تقریب کے لیے گھر میں تقریباً 40 سے 50 مہمان گھر میں موجود تھے تاہم آگ لگنے کے باعث متعدد مہمانوں نے بالائی منزل سے چھلانگ لگا کر اپنی جانیں بچائیں‘۔ انہوں نے ریسکیو ٹیم پر الزام عائد کیا کہ ان کے بروقت نہ پہنچنے کی وجہ سے دولہن سمیت 5 خواتین جاں بحق ہوئیں۔
عینی شاہدین میں شامل پاکستان مسلم لیگ ن کے سابق رکن صوبائی اسمبلی راجہ حنیف نے ڈان نیوز کو بتایا کہ ’ریسکیو کی ٹیم جائے وقوعہ پر تاخیر سے پہنچی اور جو پہلی گاڑی پہنچی تو اس میں پانی ہی موجود نہیں تھا جس وجہ سے 4 جانیں موقعے پر ضائع ہوئی جبکہ ایک لڑکی ہسپتال پہنچ کر دم توڑ گئی‘۔ انہوں نے مزید بتایا کہ ’اگر آگ پر بروقت قابو پایا جاتا تو انسانی جانوں کے ضائع سے بچا جا سکتا تھا‘۔ دوسری جانب ترجمان ریسکیو فاروق بٹ نے تمام الزمات کی تردید کی اور کہا کہ آگ کی اطلاع ملتے ہی 6 منٹ میں فائر بریگیڈ کا عملہ موقعے پر پہنچ گیا تھا تاہم گھر میں موجود افراد نے ریسکیو ٹیم پر تشدد کیا جس کے باعث آگ بجھانے میں دشواری کا سامنا رہا‘۔ اے ایس پی نیو ٹاؤن ضیاء الدین نے دولہن سمیت پانچ خواتین کے جاں بحق ہونے کی تصدیق کرتے ہوئے بتایا کہ آگ لگنے کے اسباب سے متعلق تفتیش جا رہی ہے کہ شادی والے گھرمیں آگ شارٹ سرکٹ سے لگی یا گیس کے اخراج کی وجہ بھڑکی۔
