ماہانہ 8ڈالر دیکر اپنا ٹوئٹر اکاؤنٹ آفیشل کرائیں

ئکرو بلاگنگ ویب سائٹ ٹوئٹر کی جانب سے ماہانہ 8 ڈالر کے عوض ہر کسی شخص کا اکاؤنٹ تصدیق شدہ کیے جانے کا امکان ہے۔
اس سے قبل خبریں آئی تھیں کہ ٹوئٹر تصدیق شدہ اکاؤنٹ ہولڈرز یعنی جو اکاؤنٹ بلیو ٹک ہولڈرز ہیں، ان سے ماہانہ 8 ڈالر فیس وصول کی جائے گی تاکہ ان کا اکاؤنٹ تصدیق شدہ رہے۔
لیکن اب خبر سامنے آئی ہے کہ ٹوئٹر کی جانب سے امریکا، کینیڈا، نیوزی لینڈ اور آسٹریلیا میں متعارف کرائے گئے آزمائشی فیچر سے معلوم ہوتا ہے کہ ہر اکاؤنٹ ہولڈر کو ماہانہ 8 ڈالر کے عوض بلیو ٹک فراہم کیا جائے گا۔
ٹیکنالوجی ویب سائٹ ’دی ورج‘ کے مطابق امریکا، کینیڈا، آسٹریلیا اور نیوزی لینڈ میں آئی فون پر ٹوئٹر استعمال کرنے والے افراد کو نئے فیچر تک رسائی دی گئی ہے اور صارفین کو ٹوئٹر بلیو نامی سروس کو سبسکرائب کرنے کی ہدایت کی گئی ہے۔
رپورٹ کے مطابق ٹوئٹر نے ایپل اسٹور پر ایپلی کیشن کا نیا ورژن بھی اپ لوڈ کردیا ہے، جسے ڈاؤن لوڈ کرکے استعمال کرنے والے بعض صارفین کو سبسکرپشن فیچر تک رسائی دی گئی ہے
ئے ورژن کے تحت صارفین کو بتایا جا رہا ہے کہ وہ ٹوئٹر بلیو کی سروس کو 8 امریکی ڈالر کے عوض سبسکرائب کریں، جس کے تحت انہیں بلیو ٹک فراہم کیا جائے گا۔
اسی حوالے سے ‘ٹیک کرنچ‘ نے اپنی رپورٹ میں بتایا کہ اطلاعات ہیں کہ آئی فون پر ٹوئٹر استعمال کرنے والے بعض صارفین کو ٹوئٹر بلیو نامی سروس سبسکرائب کرنے کی ہدایت کی گئی، جس کے تحت انہیں بلیو ٹک دینے کے علاوہ لمبی ویڈیوز ٹوئٹ کرنے اور اشتہارات کم نظر آنے کی پیش کش کی گئی۔
رپورٹ میں بتایا گیا کہ عندیہ ملتا ہے کہ اب ٹوئٹر تمام صارفین کو ماہانہ فیس کے عوض بلیو ٹک فراہم کر سکتا ہے، تاہم اس حوالے سے کچھ بھی کہنا قبل از وقت ہے۔
اس سے قبل یہ خبریں آئی تھیں کہ ٹوئٹر پر 7 یا 8 نومبر سے ماہانہ فیس وصولی کا آغاز کردیا جائے گا اور ان تمام اکاؤنٹس کو ماہانہ 8 ڈالر فیس ادا کرنے کا کہا جائے گا جن کے پاس بلیو ٹک ہے۔
ٹوئٹر کی جانب سے صارفین سے ماہانہ 8 ڈالر فیس وصولی کے فیصلے پر دنیا بھر میں زبردست بحث جاری ہے اور لوگ ایلون مسک کو تنقید کا نشانہ بھی بنا رہے ہیں۔

بشکریہ ڈان نیوز