ملتان میں طویل عرصے کے بعد نصب کیے گئے ٹریفک سگنلز ایک ہفتے بعد ہی غیر فعال ہوگئے۔

ملتان (اے پی پی):ملتان میں طویل عرصے کے بعد نصب کیے جانے والے ٹریفک سگنل تنصیب کے ایک ہفتے بعد ہی غیر فعال ہوگئے۔ عوامی حلقوں کاخیال ہے ہے کہ یہ سگنل خراب ہوگئے ہیں تاہم ٹریفک پولیس کے مطابق سگنل اب بھی درست حالت میں ہیں تاہم ٹریفک کے دباؤکے اوقات میں سگنلز بند کرکے پولیس اہلکاروں کی ڈیوٹی لگادی جاتی ہے۔ ملتان میں ٹریفک سگنلز اس سے پہلے صرف دو چوراہوں میں موجودتھے جن میں گھوڑا چوک اور ایس پی چوک شامل ہیں۔ نئے سگنلز دو ہفتے قبل کچہری چوک، چوک نواں شہر، چونگی نمبر9، رضا آباد اور سیداں والا بائی پاس پر نصب کیے گئے ۔ تاہم یہ سگنلز ایک روز کام کرنے کے بعد بند کردیئے گئے۔
ڈی ایس پی ٹریفک سرکل سٹی ملتان عطیہ ناہید جعفری نے اے پی پی سے بات چیت کرتے ہوئے کہاکہ ملتان میں ٹریفک کا نظام بہتربنانے اور حادثات کی روک تھام کے لیے نئے ٹریفک سگنلز نصب کیے گئے۔ سگنلز چونکہ خودکار نظام کے تحت کام کرتے ہیں اس لیے دفاتر اور سکولوں میں چھٹی کے اوقات میں بعض مقامات پردورانیہ زیادہ ہونے کی وجہ ٹریفک کے مسائل پیدا ہوئے جس کے بعد ان اوقات میں سگنلز بند کرکے وہاں ٹریفک اہلکاروں کی ڈیوٹی لگادی جاتی ہے۔انہوں نے کہاکہ سگنلز کے دورانیے کو درست کرنے کے لیے متعلقہ محکمے سے بات چیت جاری ہے اورجلد یہ مسئلہ بھی حل ہوجائے گا۔