ریاض : غیر ملکی خبر ایجنسی کے مطابق سعودی عرب کے شہر راس تنورا میں ریفائنری پر ڈرون حملہ کیا گیا جس کے بعد احتیاطاً ریفائنری بند کردی گئی ہے۔
خبرایجنسی کا بتانا ہے کہ ریفائنری پرڈرون حملےکےبعد صورتحال قابو میں ہے جبکہ محدود آگ پرقابو پا لیاگیا۔
اس حوالے سے شپنگ ذرائع کا بتانا ہے کہ حملہ پی این ایس سی چارٹرجہاز کی تیل لوڈنگ کے دوران راستنورہ پورٹ پرڈرون حملہ ہوا۔
ذرائع کے مطابق حملےکےوقت پی این ایس سی چارٹر جہازپرپاکستان کیلئےتیل لوڈ کیا جارہاتھا تاہم بعد ازاں تیل کی لوڈنگ معطل کر دی گئی۔
ایران نے ایک بار پھر اسرائیل پر میزائل حملوں کا نیا سلسلہ شروع کر دیا ہے، جس کے نتیجے میں کم از کم 7 افراد زخمی ہونے کی اطلاعات ہیں جبکہ متعدد گاڑیاں تباہ اور املاک کو شدید نقصان پہنچا ہے۔
خبر ایجنسی کے مطابق مقبوضہ بیت المقدس میں میزائل گرنے کے بعد آگ بھڑک اٹھی، جس سے علاقے میں خوف و ہراس پھیل گیا۔ اسرائیلی میڈیا کا کہنا ہے کہ مغربی یروشلم پر ہونے والے حملے میں 9 اسرائیلی شہری ہلاک اور متعدد زخمی ہوئے۔
رپورٹس کے مطابق تل ابیب، یروشلم اور مغربی کنارے کے مختلف علاقوں میں بھی میزائل حملے کیے گئے، جس کے بعد سائرن بج اٹھے اور شہریوں کو بنکروں میں منتقل کیا گیا۔
خلیجی ممالک میں کشیدگی کے دوران کویت میں امریکی سفارتخانے کے قریب دھواں اٹھتے دیکھا گیا ہے۔
خبر رساں اداروں رائٹرز اور اے ایف پی کے مطابق جائے وقوعہ پر فائر فائٹرز اور ایمبولینسز بھی پہنچ گئیں۔
کویت میں واقع امریکی سفارتخانے نے اپنی ویب سائٹ پر شہریوں کو ہدایت جاری کی ہے کہ سفارتخانے کی طرف نہ آئیں، گھروں کی نچلی منزل پر پناہ لیں، کھڑکیوں سے دور رہیں اور غیر ضروری طور پر باہر نہ نکلیں۔ سفارتخانے نے خبردار کیا ہے کہ ملک میں میزائل اور ڈرون حملوں کا خطرہ بدستور موجود ہے۔
اسی دوران بحرین کے دارالحکومت منامہ، قطر کے دارالحکومت دوحہ اور متحدہ عرب امارات کے دارالحکومت ابوظہبی میں بھی دھماکوں کی آوازیں سنی گئیں۔ امریکی نشریاتی ادارے سی این این کے مطابق دوحہ اور دبئی میں متعدد زور دار دھماکوں اور جنگی طیاروں کی پروازوں کی آوازیں سنائی دیں۔
( بشکریہ : جیو نیوز )
