پنجاب میں زلزلے کےشدید جھٹکے : بلوچستان سےہلاکتوں کی اطلاعات

اسلام آباد : پاکستان کے مختلف شہروں میں زلزلے کے جھٹکے محسوس کیے گئے، جن کی ریکٹر اسکیل پر شدت 6.1 ریکارڈ کی گئی ۔ وفاقی دارالحکومت اسلام آباد سمیت پنجاب، بلوچستان، خیبرپختونخوا، آزاد کشمیر، گلگت بلتستان کے مختلف حصوں میں زلزلے کے جھٹکے محسوس کیے گئے۔اسلام آباد، لاہور، پشاور، ایبٹ آباد، ہری پور، پارا چنار، مہمند ایجنسی، مردان، چنیوٹ، چارسدہ، ڈی آئی خان، ٹانک، لکی مروت، شانگلہ، سوات، مینگورہ، بنوں، بیلہ میں بھی زلزلے کے جھٹکے محسود کیے گئے۔زلزلے سے سب سے زیادہ متاثر صوبہ بلوچستان ہوا اور بیلہ کے علاقے میں ایک گھر کی چھت گرنے سے ایک بچی کے جاں بحق ہونے جبکہ 9 افراد کے زخمی ہونے کی بھی اطلاعات ہیں ۔ ابتدائی اطلاعات کے مطابق زلزلے کا مرکز کوہ ہندوکش ریجن افغانستان اور گہرائی 169 کلومیٹر تھی جبکہ زلزلے کے جھٹکوں کے باعث شہری کلمہ طیبہ کا ورد کرتے گھروں اور دفاتر سے باہر نکل آئے۔زلزلے کے وقت سپریم کورٹ میں مختلف کیسز کی سماعت کے دوران وکلاء اور دیگر افراد باہر آگئے جبکہ پارلیمان ہاؤس سے بھی لوگ خوف زدہ ہو کر باہر نکل آئے اور کلمہ طیبہ کا ورد کرتے نظر آئے۔علاوہ ازیں پاکستان کے علاوہ بھارتی دارالحکومت نئی دہلی، افغان دارالحکومت کابل جبکہ بھارت کے زیر انتظام مقبوضہ کشمیر کے مختلف حصوں میں بھی زلزلے کے جھٹکے محسوس کیے گئے۔
امریکی جیولوجیکل سروے (یو ایس جی ایس) کے مطابق پاکستان، انڈیا اور افغانسان میں بدھ کو 6.1 شدت کے زلزلے کے جھٹکے محسوس کیے ہیں جبکہ اس سے قبل بلوچستان میں آنے والے زلزلے سے ایک بچی ہلاک اور نو افراد زخمی ہوئے ہیں۔یو ایس جی ایس کے مطابق زلزلے کا مرکز افغانستان میں جرم کے مقام کے قریب 191 کلومیٹر گہرائی میں تھا۔پاکستان کے مقامی وقت کے مطابق زلزلے کے جھٹکے 12 بج کر سات منٹ (سات بج کر سات منٹ جی ایم ٹی) پر محسوس کیے گئے۔اس سے قبل بدھ ہی کی صبح بلوچستان کے ضلع لسبیلہ میں زلزلے کے باعث ایک کمسن بچی ہلاک اور نو افراد زخمی ہو گئے۔لسبیلہ ٹاؤن اور اس کے نواحی علاقوں میں مقامی وقت کے مطابق نو بج کر 59 منٹ پر زلزلے کے جھٹکے محسوس کیے گئے۔پاکستان کے زلزلہ پیما مرکز کے مطابق اس زلزلے کی شدت 4.9 تھی جبکہ زیر زمین اس کی گہرائی 23 کلومیٹر تھی۔زلزلے کا مرکز بیلہ سے 20 کلومیٹر دور مشرق میں بلوچستان میں تھا۔