بھارت کومنہ توڑ جواب پاک فضائیہ نے دو طیارے مارگرائے : ایک پائلٹ گرفتار

اسلام آباد: پاک فوج کے شعبہ تعلقات عامہ آئی ایس پی آر کے ڈائریکٹر جنرل (ڈی جی) میجر جنرل آصف غفور کا کہنا ہے کہ پاک فضائیہ نے پاکستانی فضائی حدود کی خلاف ورزی کرنے والے بھارتی فورسز کے 2 لڑاکا طیاروں کو مار گرایا۔ ڈی جی آئی ایس پی آر نے سماجی رابطے کی ویب سائٹ پر ٹوئٹ کیا کہ پاک فضائیہ نے لائن آف کنٹرول (ایل او سی) پر بھارتی فضائیہ کی در اندازی کو ناکام بنا دیا اور 2 بھارتی لڑاکا طیاروں کو مار گرایا۔میڈیا کے مطابق ایک بھارتی پائلٹ کو گرفتار بھی کر لیا گیا ہے ۔ ٹوئٹ میں مزید کہا گیا کہ ایک بھارتی لڑاکا طیارہ مقبوضہ کشمیر میں گر کر تباہ ہوا جبکہ دوسرا طیارہ پاکستان کے علاقے آزاد کشمیر میں گرا۔ ڈی جی آئی ایس پی آر کا مزید کہنا تھا کہ پاک فوج نے ایک بھارتی پائلٹ کو گرفتار کرلیا ہے جبکہ دیگر 2 پائلٹس کی گرفتاری کے لیے علاقے میں سرچ آپریشن جاری ہے۔ دوسری جانب ترجمان دفتر خارجہ ڈاکٹر محمد فیصل نے ایک ٹوئٹ میں پاک فضائیہ کی کارروائی کی تصدیق کی اور بتایا کہ پاک فضائیہ نے پاکستانی فضائی حدود کی خلاف ورزی پر لائن آف کنٹرول پر کارروائی کی۔ انہوں نے لکھا کہ اس کارروائی کا واحد مقصد اپنے حق کا دفاع تھا اور ہم اپنے دفاع کی صلاحیت رکھتے ہیں۔ ڈاکٹر فیصل نے لکھا کہ ہم کشیدگی نہیں چاہتے لیکن اگر ہمیں مجبور کیا گیا تو ہم مکمل طور پر تیار ہیں۔



بھارتی میڈیا نے دعویٰ کیا کہ مقبوضہ کشمیر میں گر کر تباہ ہونے والا بھارتی طیارہ نہیں بلکہ یہ آیم آئی 17 ہیلی کاپٹر ہے۔ انڈین ایکسپریس کی رپورٹ میں کہا گیا تھا کہ بھارتی ہیلی کاپٹر مقبوضہ جموں و کشمیر کے علاقے بڈگرام میں گر کر تباہ ہوا۔ رپورٹ میں بتایا گیا کہ ابتدا میں حکام نے اسے حادثہ قرار دیا، جس میں دونوں پائلٹوں کے ہلاک ہونے کا خدشہ اظہار کیا گیا ۔ بھارتی میڈیا کے مطابق واقعے کے بعد سری نگر ایئر پورٹ کو بند کردیا گیا ہے۔بھارتی طیارے گرائے جانے کے بعد ملک بھر میں خوشی کی لہر دوڑ گئی ۔ خیال رہے کہ 26 فروری کو بھارت کی جانب سے آزاد کشمیر کے علاقے میں دراندازی کی کوشش کی گئی تھی جس پر پاک فضائیہ نے بروقت ردعمل دیتےہوئے دشمن کے طیاروں کو بھاگنے پر مجبور کردیا تھا۔