ملتان (اے پی پی):ملتان پولیس نے 6 محرم الحرام کے جلوسوں اور مجالس کاسکیورٹی پلان جاری کردیا ہے ۔ترجمان ملتان پولیس کے مطابق 6 محرم الحرام بروز جمعہ کو شہر بھر میں 160 مجالس اور 55 جلوس برآمد ہوں گے ،جن میں 36 مجالس اور 12 جلوسوں کو حساس قرار دیا گیا ہے ۔
مذکورہ مجالس اور جلوسوں کی سیکیورٹی کے لیے 1597 پولیس افسران و اہلکارڈیوٹی سر انجام دیں گے جبکہ 1632 رضاکاربھی ملتان پولیس کی معاونت کریں گے۔ شہر کے اہم مقامات پر ناکہ بندی کی جائے گی، ایلیٹ فورس اور پولیس کے چاک و چوبند دستے گشت بھی کریں گے۔پولیس لائنز میں مناسب تعدار میں ریزرو افسران و اہلکار ہائی الرٹ رہیں گی جن کو کسی بھی ایمرجنسی کی صورت میں فوری طورپرطلب کیاجاسکے گا۔جلوس روٹس اورمجالس کے مقامات پر سی سی ٹی وی کیمرے جبکہ اہم مجالس کی جگہوں پر واک تھرو گیٹ نصب کیے گئے ہیں۔
تمام مجالس اور جلوسوں کی نگرانی کے لیے کنٹرول قائم کیا گیا ہے جہاں تمام مجالس اور جلوسوں کی مانیٹرنگ کی جا رہی ہے ۔تمام جلوسوں اور مجالس کی ڈرون کیمروں کے ذریعے ویڈیو ریکارڈنگ بھی کی جا رہی ہے ۔ سٹی پولیس آفیسر ملتان خرم شہزاد حیدر تمام سیکیورٹی انتظامات کی خود اور ایس ایس پی آپریشنز ملتان حسام بن اقبال مجموعی طور پر نگرانی کر رہے ہیں ۔تمام ڈویزنل ایس پیز کو اپنے اپنے علاقوں کا انچارج مقررکیا گیا ہے ۔
