ملتان میں پاکستان کاپہلا بین الاقوامی معیار کا مینگو میوزیم اور نباتاتی باغ قائم کیاجائے گا۔زاہد حسین گردیزی

ملتان (اے پی پی):ملتان میں پاکستان کاپہلا بین الاقوامی معیار کامینگو میوزیم اور نباتاتی باغ قائم کیاجائے گا۔ اس سلسلے میں تجاویز زیرغورہیں۔
نامور ترقی پسند کاشتکاراور مینگوگروورز ایسوسی ایشن کے مرکزی رہنماءزاہد حسین گردیزی نے ڈیفنس ہاؤسنگ اتھارٹی (ڈی ایچ اے)کے بورڈ آف گورنرز کو یہ عجائب گھر اورباغ قائم کرنے کی تجویز پیش کی ہے اورکہا ہے کہ مینگو میوزیم اور بوٹینکل گارڈن(نباتاتی باغ)مینگو سٹی آف پاکستان ملتان کی شناخت برقرار رکھنے میں معاون ہوگا۔انہوں نے کہاکہ ان دونوں منصوبوں پر مرحلہ وارعمل درآمد کیا جائے گا۔
زاہدحسین گردیزی نے اے پی پی سے بات چیت کرتے ہوئے بتایا کہ دنیاکے آم پیدا کرنے والے 35ممالک میں سے ہم ان ممالک سے رابطہ کریں گے جنہیں آموں کی پیداوار کے حوالے سے مرکزی حیثیت حاصل ہے۔ان میں بھارت کے علاوہ جنوبی افریقہ، کینیا، فلپائن، ملائیشیا، میکسیکو او رآسٹریلیا کے نام قابل ذکر ہیں۔ ہم ان تمام ممالک سے آموں کے پانچ پانچ پودے منگوائیں گے اور ان پودوںمیں سے جوورائٹیاں ہمارے موسم سے مطابقت رکھتی ہوںگی انہیں نباتاتی باغ میں بھی لگایاجائےگا۔ انہوں نے کہاکہ مینگو میوزیم میں بھی پاکستان سمیت دنیا بھر سے آموں کی ورائیٹیاں موجودہوںگی اور اگلے مرحلے میں ہم ان ورائٹیوں کو اپنے خطے میں بھی متعارف کروائیں گے ۔ایک سوال کے جواب میں ا نہوں نے کہاکہ ہمیں اب روایتی طریقوں کوتر ک کرکے جدید ٹیکنالوجی اور رابطے کے ذرائع کو استعمال کرکے آموں کی پیداوار اوربرآمدات میں اضافے کے لیے سنجیدہ لائحہ عمل اختیارکرناہوگا۔