پاسداران انقلاب کو دہشتگرد قرار دیاجاچکا، ایران کو نیوکلیئر پروگرام کا پھیلاؤ روکنا ہوگا: امریکا

امریکا کا کہنا ہے کہ ایرانی پاسداران انقلاب کو دہشت گرد قرار دیاجاچکا، ایران کو نیوکلیئر پروگرام کا پھیلاؤ روکنا ہوگا جبکہ غزہ کی صورتحال کی ذمہ دار حماس ہے۔
ترجمان امریکی محکمہ خارجہ ٹیمی بروس نے پریس بریفنگ میں غزہ کی صورتحال کی ذمہ دار فلسطین کی مزاحمتی تنظیم حماس کو قرار دیا۔
ٹیمی بروس نے کہا کہ غزہ کی صورتحال کی ذمہ دار حماس ہے، ٹرمپ انتظامیہ تمام فیصلے امریکی عوام کی امنگوں کے مطابق کر رہی ہے، ہم محفوظ ہیں،احترام کے ساتھ اپنے اقدار کو نافذ کرتے ہیں۔
انہوں نے کہا کہ صدر ٹرمپ کے دور میں جب امریکا معاشی لحاظ سے مضبوط ہو جائے گا تو دنیا بھی ایک بہتر جگہ ہو گی۔
امریکی وزارت خارجہ کی ترجمان ٹیمی بروس سے سوال کیا گیا کہ ٹرمپ امریکا کو پھر سے عظیم بنانے کی کوشش کر رہے ہیں مگر مقبوضہ کشمیر اور افغانستان میں بھی لوگ ان کی طرف دیکھ رہے ہیں۔
جس پر ٹیمی بروس نے کہا کہ لوگ ٹرمپ پر اعتبار کرتے ہیں اسی لیے انہیں دوبارہ منتخب کیا گیا ہے۔
ایران کو نیوکلیئر اور بیلسٹک میزائل پروگرام کا پھیلاؤ روکنا ہوگا: امریکا
ترجمان امریکی محکمہ کارجہ نے مزید کہا کہ ایران کے پاسداران انقلاب گارڈ کو بین الاقوامی دہشت گرد قرار دیا جا چکا ہے، ایران کو نیوکلیئر اور بیلسٹک میزائل پروگرام کا پھیلاؤ روکنا ہوگا۔
اس کے علاوہ ٹیمی بروس کا کہنا تھا کہ امریکا آنے والے افراد کو امریکی قوانین کی پابندی کرنا ہوگی۔
’معاہدہ نہ کیا تو بمباری ہوگی‘، امریکی صدر کی ایران کو دھمکی
امریکی صدر ڈونلڈ ٹرمپ نے ایران کو دھمکی دیتے ہوئے کہا ہے کہ اگر ایران نے جوہری ہتھیار بنانے کا سلسلہ جاری رکھا تو اس پر بمباری کی جائے گی۔
ٹرمپ کی بمباری کی دھمکی پر ایران کے سپریم لیڈر کا سخت ردعمل
صدر ٹرمپ کی دھمکی پر ایران کے سپریم لیڈر آیت اللہ خامنہ ای نے ردعمل میں کہا کہ امریکا اور اسرائیل کی دشمنی ہمیشہ سے رہی ہے، امریکا نے ایسا کوئی اقدام کیا تو اسے سخت جوابی دھچکا پہنچے گا۔
آیت اللہ خامنہ ای کا کہنا تھا امریکا نے پہلے کی طرح ایران میں بغاوت کا سوچا تو ایرانی عوام خود نمٹ لے گی۔
حماس کی دنیا بھر میں اپنے حامیوں سے ہتھیار اٹھانےکی اپیل
امریکی صدر ڈونلڈ ٹرمپ کے غزہ سے فلسطینیوں کی بے دخلی منصوبے کے خلاف حماس نے دنیا بھر میں اپنے حامیوں سے ہتھیار اٹھانے کی اپیل کی ہے۔
سینیئر حماس عہدیدار سامی ابو زہری نےکہا ہےکہ جو کوئی بھی ہتھیار اُٹھاسکتا ہو، اسے عملی اقدام کرنا چاہیے، دھماکہ خیز مواد، گولی، چاقو یا پتھر کچھ بھی نہ چھوڑیں، ہر کوئی اپنی خاموشی توڑ دے۔
اسرائیلی فوج کا رفح کو خالی کرنے کا حکم
اسرائیلی فوج کے ترجمان نے ایکس پر پوسٹ کردہ ایک بیان میں کہاکہ غزہ کے تمام رہائشی جو رفح میں موجود ہیں وہ فوری طور پر اپنے علاقے خالی کردیں۔
اسرائیلی فوج کی جانب سے رفح کے مختلف علاقوں سے شہریوں کو انخلا کا حکم دیا گیاہے اور ان سےکہا گیا ہےکہ وہ فوری طور پر المواصی کیمپ میں منتقل ہوجائیں۔
(بشکریہ:جیونیوز)