کراچی : پاکستان میں جمعرات کے روز سونے کی قیمت میں بڑا اضافہ دیکھنے میں آیا جب ایک دن میں سونے کی فی تولہ قیمت میں 8500 روپے کا اضافہ ریکارڈ کیا گیا، جو ایک دن میں اب تک ہونے والا سب سے بڑا اضافہ ہے۔
اس اضافے سے ایک تولہ سونے کی قیمت 160500 روپے کی سطح تک پہنچ گئی۔ صرافہ مارکیٹ کے ڈیلروں نے سونے کی قیمت میں ہونے والا اضافے کو ڈالر کی قیمت میں ہونے والے اضافے کی وجہ قرار دیا ہے۔دوسری جانب ملک میں ڈالر کی اونچی اڑان کا سلسلہ جاری ہے اور آج بھی امریکی ڈالر 3 روپے سے زائد مہنگا ہوا۔
انٹربینک تبادلہ مارکیٹ میں کاروبارکے اختتام پر ڈالر 239 روپے 94 پیسے کا ہوگیا۔ آج انٹربینک میں ڈالر کی قیمت 3 روپے 92 پیسے بڑھی ہے۔صرف جولائی کے مہینے میں ڈالر کا بھاؤ انٹربینک میں 35 روپے 9 پیسے بڑھ چکا ہے۔اس کے علاوہ اوپن مارکیٹ میں آج ڈالر 3 روپے اضافے سے 244 روپے کا ہوگیا۔