کراچی : اسٹیٹ بینک آف پاکستان (اسی بی پی) نے رات گئے اپنے ایک بیان میں بتایا ہے کہ پاکستان کا کرنٹ اکاؤنٹ خسارہ (سی اے ڈی) اگست میں کم ہو کر 70 کروڑڈالر پر آگیا جو کہ گزشتہ ماہ ایک ارب 20 کروڑ ڈالر تھا، کرنٹ اکاؤنٹ خسارے میں یہ کمی ماہانہ لحاظ سے 41.67 فیصد کی کمی ہے۔
مرکزی بینک نے اپنے ٹوئٹ میں بتایا کہ رواں مالی سال کے ابتدائی 2 ماہ کے لیے مالی سال 2022 کے اسی عرصے کے ایک ارب 90 کروڑ ڈالر کے مقابلے میں کرنٹ اکاؤنٹ خسارہ 50 کروڑ ڈالر کم ہوگیا۔
ٹوئٹ میں مزید بتایا گیا ہے کہ کرنٹ اکاؤنٹ خسارے میں کمی کی بنیادی وجہ برآمدات میں 50 کروڑ ڈالر کا اضافہ اور درآمدات میں 20 کروڑ ڈالر کی کمی ہے۔
ایس بی پی کے اعداد و شمار سے ظاہر ہوتا ہے کہ اشیا اور خدمات میں تجارت کے توازن کے فرق میں بھی ماہانہ لحاظ سے 0.54 فیصد کمی ہوئی جس کے بعد یہ تین ارب 98 کروڑ ڈالر رہ گیا۔
اگست کے دوران اشیا کی درآمدات 5 ارب 75 کروڑ ڈالر رہی جو کہ گزشتہ ماہ 5 ارب 35 کروڑ ڈالر تھی، دوسری جانب، برآمدات میں بھی نمایاں اضافہ ہوا جو 23.38 فیصد بڑھ کر 2 ارب 81 کروڑ ڈالر تک پہنچ گئیں جو کہ جولائی میں 2ارب 28 کروڑ ڈالر سے تھیں۔بیرون ملک مقیم پاکستانیوں کی جانب سے ترسیلات زر گزشتہ ماہ کے 2ارب 52 کروڑ ڈالر کے مقابلے میں 2ارب 72 کروڑ ڈالر تک پہنچ گئیں۔
پاکستان نے گزشتہ مالی سال میں 17ارب 30 کروڑ ڈالر یا ماہانہ اوسطاً ایک ارب 44 کروڑ ڈالر کا زبردست کرنٹ اکاؤنٹ خسارہ ریکارڈ کیا۔
میٹیس گلوبل کی رپورٹ کے مطابق مرکزی بینک کو توقع ہے کہ رواں سال کے دوران کرنٹ اکاؤنٹ خسارہ کم ہو کر 10 ارب ڈالر ہوجائے گا۔