معاہدے کی خلاف ورزی کیوں کی؟ اماراتی بورڈ نے پاکستانی کرکٹر پر پابندی عائد کردی

پاکستانی کرکٹر عثمان خان پر اماراتی کرکٹ بورڈ کی جانب سے معاہدے کی خلاف ورزی کرنے پر 5 سالہ پابندی عائد کردی گئی۔
یو اے ای کرکٹ بورڈ کی جانب سے بتایا گیا ہے کہ معاہدے کے مطابق عثمان خان عرب امارات کی طرف سے کھیلنے کے پابند تھے مگر سہولیات کا فائدہ اٹھاے کے بعد اب ایسا نہیں کررہے۔
اماراتی کرکٹ بورڈ کی طرف سے عثمان خان کو سالانہ کنٹریکٹ بھی دیا گیا تھا، اس کے علاوہ آئی ایل ٹی ٹوئنٹی میں بھی وہ ایکشن میں نظر آئے تھے۔
امارات کے کرکٹ بورڈ کا کہنا ہے کہ عثمان خان نے معاہدے کی خلاف ورزی کی ہے جس کی وجہ سے اب وہ بورڈ کے تحت ہونے والے کسی بھی ایونٹ میں شرکت نہیں کر سکیں گے، اور یہ پابندی 5 سال کے لیے ہوگی۔
یاد رہے کہ عثمان خان نے پاکستان سپر لیگ میں ملتان سلطانز کی نمائندگی کی تھی جس کے بعد انہیں پاکستانی کرکٹ ٹیم کے کیمپ میں شامل کیا گیا۔
عثمان خان نے اس کے بعد یو اے ای کو نوٹس بھیجا تھا کہ ان کا معاہدہ ختم کیا جائے۔
(بشکریہ:آج نیوز)