ملتان : جلال پور میں سیلاب زدگان کی کشتی ڈوب گئی 4 بچوں سمیت پانچ افراد جاں بحق

ملتان : تحصیل جلال پور پیروالا میں دریائے چناب میں آنے والے سیلابی ریلے سے متاثرین کے انخلا کے دوران کشتی الٹنے سے ایک بزرگ خاتون اور چار کم عمر بچے ہلاک ہو گئے ہیں۔
پی ڈی ایم اے کے اعلامیے کے مطابق جلال پور پیروالا کے نواحی علاقے وچھہ سندیلہ میں پیش آیا جہاں سے بذریعہ کشتی سیلاب متاثرین کے انخلا کا کام جاری تھا۔
اس دوران پانی کے تیز بہاؤ کے باعث کشتی کا توازن بگڑ گیا اور 20 سے زائد افراد ڈوب گئے۔
اعلامیے میں بتایا گیا ہے کہ ریسکیو ٹیموں نے فوری رد عمل کے طور پر شہریوں کو محفوظ مقام پر منتقل کر دیا تاہم اس دوران کشتی میں سوار ایک خاتون اور چار بچے دریا میں ڈوب کر ہلاک ہو گئے ہیں۔
ریسکیو اور مقامی افراد نے خاتون اور تین بچوں کی لاشیں دریا سے نکال لیں۔ حادثے میں 80 سالہ بخت بی بی، سات سالہ عامر، چھ سالہ فاطمہ، تین سالہ ماہ نور اور تین ماہ کے ریحان جان کی بازی ہار گئے۔
پی ڈی ایم اے کے مطابق ریحان کی ڈیڈ باڈی نہیں مل سکی جس کی تلاش کا کام جاری ہے۔
عینی شاہدین کے مطابق کشتی گہرے پانی میں پہنچ کر توازن برقرار نہ رکھ سکی اور حادثے کا شکار ہوئی۔
اعلامیے میں کہا گیا ہے کہ اس واقعے کی اطلاع ملنے پرڈی جی پی ڈی ایم اے نے ڈی سی ملتان سے ٹیلیفون پر رابطہ کیا اور زخمیوں کو بہترین طبی امداد فراہم کرنے کی ہدایت کی۔
پی ڈی ایم اے پنجاب کے ڈی جی نے سیلابی صورتحال میں متاثرین کے انخلا کو محفوظ بنانے پر زور دیتے ہوئے کہا ہے کہ انخلا کے دوران پرائیویٹ بوٹس یا ریسکیو بوٹس میں ہرگز اورلوڈنگ نہ کی جائے۔
( بشکریہ بی بی سی )