نوشکی دالبندین شاہراہ پر ایف سی کےقافلے پر خودکش حملہ، 3 اہلکاروں سمیت7 افراد شہید

نوشکی : بلوچستان میں نوشکی دالبندین شاہراہ پر ایف سی کے قافلے پرکالعدم بی ایل اے کے خودکش حملے میں 3 ایف سی اہلکاروں سمیت 7 افراد شہید اور متعدد زخمی ہوگئے۔حملے میں متعدد افراد زخمی ہوئے ہیں جن میں سےکئی زخمیوں کی حالت تشویشناک ہے، دھماکےکے زخمیوں کو علاج کے لیے ہیلی کاپٹر کے ذریعےکوئٹہ منتقل کیا جا رہا ہے۔
سکیورٹی ذرائع کا کہنا ہےکہ کالعدم بی ایل اےکے دہشت گردوں نے آج صبح ایف سی کانوائے پر بارودی دھماکا اور خود کش حملہ کیا۔ خودکش حملے میں 3 ایف سی اہلکار اور 2 شہری شہید ہوگئے۔سکیورٹی فورسز نے دہشت گردوں کے خلاف فوری جوابی کارروائی کی، ابتدائی کارروائی میں 3 دہشت گرد جہنم واصل کردیے گئے۔ سکیورٹی فورسز نےعلاقےکو گھیرے میں لے کر کلیئرنیس آپریشن شروع کردیا ہے، سکیورٹی فورسز نے تمام راستے بلاک کر دیے ہیں۔سکیورٹی ذرائع کا کہنا ہےکہ آخری دہشت گرد کے خاتمے تک کلیئرنس آپریشن جاری رہےگا۔
دوسری جانب پولیس کا کہنا ہے کہ نوشکی دالبندین شاہراہ پربس کے قریب دھماکے میں 5 افراد جاں بحق اور 35 زخمی ہوئے جنہیں طبی امداد کے لیے نوشکی اسپتال منتقل کیاگیا، اسپتال میں دوران علاج 2 زخمی دوران علاج دم توڑ گئے جس کے بعد جاں بحق افراد کی تعداد 7 ہو گئی، زخمیوں میں متعدد افراد کی حالت تشویشناک ہے۔ایم ایس میر گل خان نصیر ٹیچنگ اسپتال نوشکی کا کہنا ہے کہ اسپتال میں ایمرجنسی نافذ کر دی گئی ہے۔
وزیر اعظم شہباز شریف نے نوشکی میں دھماکے کی مذمت کرتے ہوئے قیمتی جانوں کے نقصان پر اظہار افسوس کیا ہے اور کہا ہےکہ اس قسم کی بزدلانہ کارروائیاں دہشت گردی کے خلاف ہمارے عزم کو متزلزل نہیں کرسکتیں۔وفاقی وزیر داخلہ محسن نقوی نےکہا ہےکہ معصوم لوگوں کو نشانہ بنانا سفاکیت کی انتہا ہے، اس طرح کی بزدلانہ کارروائیوں کے ذریعے قوم کے پختہ عزم کو کم زور نہیں کیا جاسکتا۔وزیراعلیٰ بلوچستان سرفراز بگٹی نے نوشکی دالبندین شاہراہ پربس کے قریب دھماکےکی مذمت کرتے ہوئے قیمتی جانوں کے ضیاع پرگہرے دکھ اور افسوس کا اظہار کیا ہے۔سرفراز بگٹی نے کہا ہےکہ صوبے کے امن سے کھیلنے والوں کو عبرتناک انجام تک پہنچائیں گے، بزدلانہ حملے ہمارے حوصلے پست نہیں کر سکتے، دہشت گردوں کوکہیں پناہ نہیں ملےگی، بلوچستان میں ہر قیمت پر امن قائم کریں گے۔انہوں نے مزید کہا کہ دشمن عناصر سن لیں ریاست ان کے ناپاک عزائم خاک میں ملا دے گی، یہ جنگ آخری دہشت گرد کے خاتمے تک جاری رہےگی، امن دشمنوں کوکیفر کردار تک پہنچانے کے لیے ہر ممکن اقدم کریں گے۔
( بشکریہ : جیو نیوز )