راول پنڈی : آرمی چیف جنرل سید عاصم منیر کی والدہ قضائے الٰہی سے وفات پا گئیں۔ وزیراعظم شہبازشریف نے آرمی چیف جنرل سید عاصم منیر کی والدہ کےانتقال پر اظہار افسوس کرتے ہوئے کہا کہ سوگوار خاندان کے دکھ میں برابر کے شریک ہیں۔وزیراعظم نے مرحومہ کے لیے بلند درجات کی دعا بھی کی۔ جمعیت علمائے اسلام کے سربراہ مولانا فضل الرحمان نے آرمی چیف کی والدہ کی وفات پر اظہار افسوس کرتے ہوئے کہا کہ ماں جیسی شفیق اور پیار کرنے والی ذات کی رحلت یقیناً بڑا صدمہ ہے۔مولانا فضل الرحمان نے کہا کہ اللہ کریم مرحومہ کی کامل مغفرت فرما کر اعلیٰ علیین میں مقام عطا فرمائےا ور اللہ کریم جنرل عاصم منیر ،ان کی فیملی کو صبر جمیل عطاء فرمائے۔
چیئرمین سینیٹ یوسف رضا گیلانی اور سابق چیئرمین سینیٹ صادق سنجرانی نے بھی آرمی چیف کی والدہ کےانتقال پرگہرے دکھ اور افسوس کا اظہار کرتے ہوئے مرحومہ کے بلند درجات کے لیے دعاکی اور آرمی چیف جنرل عاصم منیر سے اظہارہمدردی کیا۔وزیرداخلہ محسن نقوی نے بھی آرمی چیف جنرل عاصم منیرکی والدہ کے انتقال پر اظہارِ افسوس کیا اور مرحومہ کی بلند درجات اور سوگوار خاندان کے لئے صبر جمیل کی دعا کی۔اس کے علاوہ آرمی چیف جنرل عاصم منیر کی والدہ کے انتقال پر سینیٹر سلیم مانڈوی والا نے بھی اظہار تعزیت کیا۔
سلیم مانڈوی والا نے جنرل عاصم منیر اور اہل خانہ سے دلی ہمدردی و تعزیت کا اظہار کیا۔
دریں اثناء چیف آف آرمی اسٹاف کی والدہ ماجدہ کی نماز جنازہ ادا کردی گئی ہے جس صدر مملکت، وزیراعظم اور نواز شریف سمیت دیگر نے شرکت کی۔ایکسپریس نیوز کے مطابق آرمی چیف جنرل عاصم منیرکی والدہ ماجدہ کی نماز جنازہ رات 9 بج کر 45 منٹ پر ریس کورس پارک راولپنڈی میں ادا کی گئی اور امامت کی سعادت حافظ سید عاصم منیر نے خود حاصل کی۔ نماز جنازہ میں صدر آصف علی زرداری، وزیراعظم شہبازشریف، اور نوازشریف، وفاقی وزیر داخلہ، دفاع، وزرا، اراکین پارلیمنٹ، چیئرمین سینیٹ سمیت دیگر نے شرکت کی۔اس کے علاوہ آرمی چیف کے عزیز و اقارب، خاندان کے لوگوں، شہریوں کی بڑی تعداد اور عسکری حکام نے بھی شرکت کی۔
