ادبی بیٹھک نے مکالمے کو فروغ دیا : سولہویں سالگرہ کی تقریب سے رضی الدین رضی ، ڈاکٹر مقبول گیلانی کا خطاب

ملتان ۔۔ پنجاب آرٹس کونسل ملتان کی ادبی بیٹھک اس شہر کے ادبی ماحول میں تازہ ہوا کا جھونکا ثابت ہوئی اور اس نے بہت سی خوبصورت روایات قائم کیں ۔ ان خیالات کا اظہار ادبی بیٹھک کی سولہہویں سالگرہ کی تقریب میں کیا گیا ۔۔ تقریب کی صدارت بیٹھک کے بانی چئیرمین رضی الدین رضی نے کی مہمان خصوصی ڈاکٹر مقبول گیلانی تھے ۔ تقریب سے خطاب کرتے ہوئے رضی الدین رضی نے کہا کہ یہ بیٹھک ہمارا خواب تھا جسے میرے دوستوں نے تعبیر دی۔
انہوں نے کہا کہ اس بیٹھک نے تؑصبات سے بالا تر ہو کر ادبی مکالمے کو فروغ دیا ۔

نامور ماہر تعلیم ڈاکٹر مقبول گیلانی نے کہا ہر ہفتے کسی بھی اجلاس کا تسلسل سے انعقاد مشکل کام ہے ۔ ایسی محفلوں میں نوجوانوں کی تربیت ہوتی ہے ہم نے اردو اکاد می کے اجلاسوں سے بہت کچھ سیکھا ۔
تحسین غنی نے کہا کہ سخن ور فورم نے اس بیٹھک میں رفتگاں کو بھی یاد کیا اور زندہ قلمکاروں کو بھی عزت دی ۔ فضہ شہوار نے کہا میں نے اس بیٹھک میں بہت کچھ سیکھا اور پھر شعری مجموعے کی اشاعت کے بعدمجھے یہیں سےاعتماد حاصل ہوا ۔ڈاکٹر واجد برکی اور جاوید یاد نے کہا آنے والے دنوں میں نئی روایات قائم کی جائیں گی ۔لقمان ناصر نے کہا یہ محفلیں ہمارے گم شدہ ماضی کی تلاش میں مدد دیتی ہیں ۔ ظہیر عباس بھٹی نے کہا ہمیں یہاں آگے بڑھنے کا حوصلہ ملا ۔ کسی نے حوصلہ شکنی نہیں کی ۔


سخن ور فورم کے سیکریٹری جنرل شہزاد عمران خان نے کہا مجھے جو ذمہ داریاں سونپی گئی ہیں کوشش کروں گا کہ سینئرز کی رہنمائی میں انہیں خوش اسلوبی سے پورا کروں ۔۔ تقریب میں عدنان فاروق قریشی ، ہارون الرشید ، ناصر ظہیر ، اختر وینس ، تاج محمد تاج ، طارق شاہ ، عبدالقیوم اور دیگر بھی شریک ہوئے ۔ بعد ازاں ادبی بیٹھک کی سالگرہ کا کیک کاٹا گیا