اسلام آباد : ہائیکورٹ نے ٹک ٹاکر مسٹر پتلو کی حفاظتی ضمانت منظور کرتے ہوئے پولیس کو 10 نومبر تک ملزم کو گرفتار کرنے سے روک دیا ہے۔ جبکہ عدالت نے ملزم کو 10 نومبر کو دوبارہ عدالت میں پیش کرنے کا حکم بھی دیا ہے۔
خیال رہے کہ سنیچر کو صوبہ پنجاب کے شہر سیالکوٹ کی پولیس نے مہندی کی تقریب کے دوران بھگدڑ مچنے سے دو افراد کی ہلاکت اور متعدد کے زخمی ہونے پر ٹک ٹاکر انصر محمود عرف مسٹر پتلو سمیت دیگر کے خلاف مقدمہ درج کیا تھا۔
منگل کے روز اسلام آباد ہائیکورٹ کے چیف جسٹس سرفراز ڈوگر نے مسٹر پتلو کی حفاظتی ضمانت پر سماعت کی۔ کمرۂ عدالت کے باہر موجود مقامی صحافیوں کے مطابق مسٹر پتلو ایک وہیل چیئر پر بیٹھے اور چہرے پر ماسک لگائے عدالت کے احاطے میں داخل ہوئے تھے۔
ان کے وکیل قاسم نواز عباسی نے چیف جسٹس سرفراز ڈوگر کے پاس اپنے موکل کی حفاظتی ضمانت کی درخواست دی جسے ایک ہفتے کے لیے منظور کر لیا گیا۔ حفاظتی ضمانت ملنے کے بعد ٹک ٹاکر خود چل کر سیڑھیاں اترے اور پھر وہیل چیئر پر بیٹھ کر اپنے وکیل کے ہمراہ روانہ ہوگئے۔
ملزم کے وکیل قاسم نواز عباسی نے میڈیا کو بتایا کہ ان کے موکل نے تقریب کے انعقاد کے لیے سیالکوٹ کی ضلعی انتظامیہ سے این او سی یعنی اجازت نامہ حاصل کیا تھا۔ انھوں نے کہا کہ اس تقریب کے لیے امن و امان قائم کرنے کی ذمہ داری ضلعی انتظامیہ کی تھی۔
انھوں نے دعویٰ کیا کہ جس وقت یہ واقعہ رونما ہوا تب ان کے موکل موقع پر موجود نہیں تھے بلکہ وہ ’علاج کی غرض سے ایک ہسپتال میں تھے۔‘
انھوں نے الزام عائد کرتے ہوئے کہا کہ ان کے موکل کو ’خطرہ ہے کہ کہیں سی سی ڈی کے اہلکار انھیں پولیس مقابلے میں ہلاک نہ کر دیں۔‘
انھوں نے دعویٰ کیا کہ پنجاب پولیس ان کے موکل کی فیملی کو ’تنگ کر رہی ہے۔ پولیس اہلکار گھر سے موبائل فون اور دیگر اشیا اپنے ساتھ لے گئے ہیں۔‘
( بشکریہ : بی بی سی )
