جو بھی ہماری سالمیت کی خلاف ورزی کی کوشش کریگا ہمارا جواب بے رحمانہ ہوگا: ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نےکہا ہےکہ جو بھی ہماری سرزمین اور سالمیت کی خلاف ورزی کی کوشش کرےگا ہمارا جواب بے رحمانہ ہوگا۔
بھارت کے ساتھ جنگ ​​بندی کے چار دن بعد برطانوی میڈیا سےگفتگو میں احمد شریف چوہدری نے خبردار کیا کہ ایٹمی صلاحیت رکھنے والے پڑوسیوں کے درمیان سنگین کشیدگی دونوں ملکوں کو تباہ کر دےگی، اگربھارت یہ سوچتا ہےکہ وہ جنگ کےلیے کوئی بہانہ تراش سکتا ہے تو یہ حقیقت میں دوطرفہ تباہی کی وجہ ہوگی۔
ڈی جی آئی ایس پی آر کا کہنا تھا کہ امریکا جیسے ممالک جوہری خطرات کے پیش نظر بھارتی عزائم کو بخوبی جان چکے ہیں، اگر بھارت نے جنگ بندی کی خلاف ورزی کی تو پاکستان اس کا فوری اور سخت ترین جواب دےگا، پاکستان کا مؤقف ہےکہ اس نے ایک بہت بڑی فوجی فتح حاصل کرلی ہے۔
ترجمان پاک فوج کا کہنا تھا کہ بھارت اندرونی معاملہ قرار دےکربھارتی فوج کی موجودگی کے ساتھ کشمیریوں کو ہراساں کر رہا ہے، مسئلہ کشمیر کو سلامتی کونسل کی قرارداد کے مطابق حل کرنا ہوگا۔
لیفٹیننٹ جنرل احمد شریف چوہدری کا کہنا تھا کہ بھارت اس بات پر ناراض ہے کہ امریکا اس بحران کے دوران مسئلہ کشمیر کو اجاگر کر رہا ہے، امریکا کے لیے اصل امتحان یہ ہے کہ وہ بھارت پر کتنا دباؤ ڈال سکتا ہے۔
(بشکریہ:جیونیوز)