کراچی : پاکستان سٹاک ایکسچینج میں جمعے کے روز تیزی کا رجحان ریکارڈ کیا گیا ہے جس کے بعد انڈیکس میں 1500 پوائنٹس سے زائد کا اضافہ ریکارڈ کیا گیا۔مارکیٹ میں کاروبار کا آغاز مثبت انداز میں ہوا اور انڈیکس میں مسلسل اضافہ ریکارڈ کیا گیا جس کے بعد انڈیکس ایک لاکھ 20 ہزار پوائنٹس کی سطح عبور کر کے 120440 پوائنٹس کی سطح تک پہنچ گیا۔
پاکستان سٹاک ایکسچینج میں تیزی کی وجہ حکومت کی جانب سے بجلی کی قیمت میں کمی کو قرار دیا گیا ہے۔تجزیہ کاروں کے مطابق حکومت کی جانب سے گھریلو اور صنعتی صارفین کے لیے بجلی کی قیمت میں کمی معیشت کے شعبے کے لیے اچھی خبر ہے جس کا اثر سٹاک ایکسچینج میں کاروبار پر مثبت انداز میں ہوا۔
تجزیہ کار جبران سرفراز نے بی بی سی اردو کو بتایا ملک میں بجلی کی قیمت کی کمی نے سٹاک ایکسچینج میں تیزی کو فروغ دیا تو اس کے ساتھ مارچ کے مہینے میں مہنگائی کی شرح میں کمی بھی معیشت کے لیے ایک مثبت پیشرفت ہے جس نے کاروبار میں مثبت رجحان کو فروغ دیا۔حکومتی اعداد و شمار کے مطابق مارچ کے مہینے میں مہنگائی کی شرح 0.70 فیصد رہی جو 59 سال کی کم ترین سطح ہے۔
( بشکریہ : بی بی سی اردو )
فیس بک کمینٹ