دبئی :پی ایس ایل کے دفاعی چیمپیئن پشاور زلمی کو 19 رنز سے ہرا کر ملتان سلطان نے ایک اور کامیابی حاصل کر لی ، پشاور زلمی کو ملتان سلطانز نے 184 رنز کا ٹارگٹ دیا تھا ۔ صہیب مقصود کی جارحانہ بیٹنگ کی بدولت ملتان سلطانز نے رواں ٹورنامنٹ کا سب سے بڑا اسکور 183 رنز اسکور کرتے ہوئے پشاور زلمی کو میچ میں فتح کیلئے رنز کا 184 ہدف دیا۔ملتان سلطانز کے اوپنرز کمار سنگاکارا اور احمد شہزاد نے اپنی ٹیم کو 51 رنز کا عمدہ آغاز فراہم کیا لیکن لیام ڈاسن نے 28 رنز بنانے والے سنگاکارا کی مزاحمت کا خاتمہ کرتے ہوئے اپنی ٹیم کو پہلی کامیابی دلائی۔صہیب مقصود شروع سے ہی جارحانہ موڈ میں نظر آئے اور شہزاد کے ساتھ دوسری وکٹ کیلئے 56 نز جوڑے لیکن دوسرے اینڈ سے احمد شہزاد نے حد سے زیادہ محتاط بیٹنگ کا مظاہرہ کیا اور 37 گیندوں پر اتنے ہی رنز بنانے کے بعد رن آؤٹ ہوئے جبکہ کپتان شعیب ملک 13 رنز بنا سکے۔جب ملک آؤٹ ہوئے تو ایسا محسوس ہوتا تھا کہ ملتان سلطانز 150 رنز تک بنانے میں کامیاب رہیں گے لیکن اختتامی اوورز میں صہیب مقصود نے جارحانہ انداز اپنایا اور آخری تین اوورز میں 42 رنز بنا کر اسکور کو 183 تک پہنچا دیا۔ملتان سلطانز نے مقررہ اوورز میں تین وکٹوں کے نقصان پر 183 رنز بنائے، صہیب مقصود نے عمدہ بیٹنگ کرتے ہوئے سات چھکوں اور چار چوکوں کی مدد سے 42 گیندوں پر 85 رنز کی اننگز کھیلی جبکہ پولارد نے آٹھ گیندوں پر دو چھکوں کی مدد سے 16 رنز بنائے۔اس سے قبل دبئی میں کھیلے جا رہے میچ میں پشاور زلمی کے قائم مقام کپتان محمد حفیظ نے ٹاس جیت کر ملتان سلطان کو بیٹنگ کی دعوت دی ۔
