پاکستان کے بولنگ کوچ مورنی مورکل نے اپنے عہدے سے استعفیٰ دے دیا۔
پاکستان کرکٹ بورڈ کی جانب سے تصدیق کی گئی ہے کہ مورنی مورکل نے لیگز میں مصروفیت کی وجہ سے عہدے سے استعفی دیا۔
اس سے قبل مورنی مورکل کو دورہ آسٹریلیا تک ٹیم کے ساتھ کام کرنا تھا۔
مورنی مورکل کا پی سی بی کے ساتھ چھ ماہ کا معاہدہ ہوا تھا، مورنی مورکل نے لیگز میں مصروفیت کے باعث طویل معاہدہ نہیں کیا تھا۔
بھارت میں جاری ورلڈکپ میں پاکستان کا سفر پانچویں پوزیشن کے ساتھ اختتام پزیر ہو چکا ہے اور اب قومی کھلاڑیوں کی ٹولیوں کی صورت میں وطن واپسی کا سفر جاری ہے۔
ورلڈکپ میں بیٹرز کے ساتھ ساتھ قومی ٹیم کا بولنگ اٹیک بھی بری طرح ناکام ثابت ہوا اور پاکستان کرکٹ بورڈ کی جانب سے قومی ٹیم کا پوسٹ مارٹم کیے جانے کا امکان ہے۔
ذرائع کے مطابق مورنی مورکل کی جگہ قومی ٹیم کے سابق فاسٹ بولر عمر گل کو بولنگ کوچ کی ذمہ داریاں ملنے کا امکان ہے۔
عمر گل کا بیان:
اس حوالے سے سابق فاسٹ بولر عمر گل کا کہنا ہے کہ سوشل میڈیا پر دیکھا ہے کہ شاید بولنگ کوچ کے لیے میرے بارے میں سوچا جارہا ہے، میرا بورڈ سے ابھی کوئی رابطہ نہیں ہوا۔
انہوں نے کہا کہ مورنی مورکل کا کانٹریکٹ شاید دسمبر تک تھا، پاکستان کی پہلے بھی نمائندگی کی ہے،موقع ملا تو دوبارہ کروں گا۔
(بشکریہ:جیو نیوز)
