ملتان ( نمائندہ گردوپیش ) وہاڑی میں بس ہوسٹس کے ساتھ زیادتی کے واقعے کا آر پی او ملتان نے سخت نوٹس لیا ہے جس کے بعد اس واقعے کا مقدمہ درج کر کے ملزم شیراز کو گرفتار کر لیا گیا ہے اور بس قبضے میں لے لی گئی ہے ۔
آر پی او کیپٹن ( ر) سہیل چوہدری کی جانب سے قائم مقام ڈی پی او کو تمام شواہد و ثبوت اکٹھے کرنے کی ہدایت کی گئی ہے ۔ آر پی او نے کہا کہ ملزم کو عدالت سے قرار واقعی سزا دلوائی جائیگی۔
یاد رہے کہ وہاڑی میں مسافر بس میں 18 سال کی بس ہوسٹس کو زیادتی کا نشانہ بنا دیا گیا۔
پولیس کے مطابق بس کے گارڈ نے اسلحہ کے زورپربس ہوسٹس کو زیادتی کا نشانہ بنایا اور فرار ہوگیا جسے بعدازاں پولیس نے گرفتار کرلیا۔
پولیس نے بتایا کہ واقعہ چلتی بس میں میلسی سے وہاڑی آتےہوئے پیش آیا، بس کے تمام مسافر میلسی میں اتر گئےتھے اور بس وہاڑی بس اسٹینڈ پر آرہی تھی، گارڈ نے بس کو لاک کرکے بس ہوسٹس سے زیادتی کی۔
پولیس کا کہنا ہے کہ زیادتی کا شکار متاثرہ بس ہوسٹس کو تشویشناک حالت میں ڈی ایچ کیواسپتال منتقل کردیا گیا۔
