ملتان(نمائندہ گردو پیش )ایف آئی اے سائبر کرائم ملتان نے جعلی پولیس آفیسر بن کر سادہ لوح شہریوں سے کروڑوں روپے ہتھیانے والے 10 فراڈیوں کو گرفتار کرکے 11 موبائل فون اور لاکھوں روپے کی نقدی برآمد کر لی۔
ایف آئی اے سائبر کرائم ونگ کو شکایات موصول ہو رہی تھیں کہ جعلسازوں کا گروہ کافی عرصہ سے پولیس ملازم بن کر شہریوں کو ان کے بچوں کو گرفتار کرنے اور ان کے خلاف مقدمات درج کرنیکی دھمکی دیتے تھے اور ان سے بھاری رقوم لوٹتے تھے۔جس پر ایف آئی سائبر کرائم حکام نے سب انسپکٹر عمر خان اور ذیشان منیر خان کی سربراہی میں ریڈنگ ٹیم تشکیل دی جنہوں دن رات محنت کرکے گروہ کے 10 ارکان ندیم ولد صدیق،حسن منیر ولد منیر،جہانزیب ولد حنیف،عرفان ولد سلیمان، شفیق ولد صدیق، عامر ولد اشرف، ابوبکر ولد سلمان،سعد ولد سلمان، محسن ولد حقنواز اور شفیق ولد شفیق کو کامیاب چھاپہ مار کر خانیوال اور ملتان سے گرفتار کر لیا ہے۔
ایف آئی اے ٹیم نے ملزمان کے قبضے سے 11 موبائل فون اور 4 لاکھ 37 ہزار روپے کی نقدی بھی برآمد کر لی ہے۔ذرائع کا کہنا ہے کہ ایف آئی اے سائبر کرائم ٹیم نے ملزمان کے خلاف مقدمہ درج کرلیا ہے اور مصروف تفتیش ہے۔ذرائع کا کہنا ہے کہ جعلساز گروہ اب تک ملک بھر کے شہریوں سے کروڑوں روپے ہتھیا چکا ہے۔
