سٹیج اداکارہ آئمہ خان اوراس کاشوہر اغوا برائے تاوان کے الزام میں گرفتار۔بچہ بازیاب کرالیاگیا

ملتان:ملتان پولیس نے دوروز قبل مبینہ طورپر تاوان کے لیے اغوا کیے جانے والے ااڑھائی سالہ بچے کو معروف سٹیج اداکارہ آئمہ خان کے گھر سے برآمد کرکے ملزمہ آئمہ خان ،اس کے شوہر اور دیور کو گرفتار کرلیا۔ سی پی او ملتان خرم شہزاد حیدرنے ایڈیشنل انسپکٹر جنرل آف پولیس جنوبی پنجاب ظفراقبال اعوان کے ہمراہ پریس کانفرنس کے دوران واقعہ کی تفصیلات بتائیں۔ وقوعہ کے مطابق دوروز قبل پولیس کواطلاع دی گئی تھی کہ میاں گل ولد گل محمد کااڑھائی سالہ پوتا نقیب اللہ اپنی خالہ صائمہ کے ہمراہ گھر سے باہر نکلاتو دونامعلوم موٹرسائیکل سوار نقیب اللہ کو اٹھا کر فرارہوگئے۔
سی پی او ملتان خرم شہزاد حیدر نے وقوعہ کا نوٹس لیتے ہوئے ملزمان کو گرفتار کر کے بچے کی فوری بازیابی کے احکامات جاری کیے اور ایس ایس پی آپریشنز ملتان کیپٹن (ر) محمد عامر خان نیازی کی سربراہی میں ٹیمیں تشکیل دیں۔پولیس نے ناکہ بندی کے بعد گھر گھر تلاشی لی اور 30گھنٹوں کے کامیاب آپریشن کے بعد بچے کو آئمہ خان کے گھر سے بحفاظت بازیاب کرلیا۔آئمہ خان ،اس کے خاوند مدثر اوردیور مظفر کو گرفتار کرلیاگیا۔ پولیس کے مطابق اغوا کاروں نے بچے کوتاوان کے لیے اغوا کیاتھا۔نقیب اللہ کواس کے والدین کے حوالے کردیاگیاہے۔