ورلڈ چیمپئن خود غرض نکلے،انگلینڈ ٹیم کا کورونامتاثرین کی مدد سے انکار : عمران عثمانی کی خصوصی رپورٹ

ورلڈ چیمپئن اصل میں کون ہوتے ہیں؟ وہ جو حقیقی چیمپین ہوں اور یا وہ جو ظاہری ہوں اور وہ بھی ایسے کہ لوگ ان کی فتح کو متنازع سمجھتے ہوں اور اوپر سے جب اصل چیمپئن بننے کا وقت آئے تو وہ اپنے عمل سے آشکار کر دیں کہ وہ واقعی متنازعہ اور ظاہری چیمپئن ہیں.
انگلینڈ کرکٹ پلیئرز نے ثابت کیا ہے کہ وہ حقیقی ورلڈ چیمپئن نہیں.
کورونا وائرس کی وجہ سے دنیا بھر کی سپورٹس سرگرمیاں معطل ہیں ایسے میں مختلف ممالک اپنے عمل سے متاثرین کی امداد بھی کر رہے ہیں اور ایک دوسرے سے تعاون بھی. ایسی ہی ایک کاوش انگلش بورڈ نے کی لیکن حیران کن انکشاف ہوا ہے کہ ورلڈ چیمپئن مورگن الیون اسی طرح ٹیسٹ کپتان جوئے روٹ اور ان کے ساتھی اچھی مثال پیش کرنے میں ناکام رہے.
انگلینڈ کرکٹ بورڈ کی جانب سے 29 مارچ کو پلیئرز کی نمائندہ یونین پروفیشنل کرکٹ ایسوسی ایشن کو ایک خط لکھے جانے کا انکشاف ہوا ہے جس میں کہا گیا تھا کہ پلیئرز کورونا متاثرین کیلئے ایک قربانی کا جذبہ وخیر سگالی کے طور پر اپنی ماہانہ تنخواہ میں سے 25 فیصد کٹوتی کروائیں تاکہ کرکٹرز کی طرف سے روشن مثال پیش ہو. اس پر پی سی اے کے چیئرمین ٹونی آئرش نے سنٹرل کنٹریکٹ پلیئرز سے بات کی تو انہوں نے انکار کردیا ،اس پر 20 فیصد کی بھی پیشکش کی گئی وہ بھی ناکام گئی.
انگلینڈ بورڈ کے چیف ایگزیکٹو ٹام ہوریسن نے اس پر مایوسی ظاہر کرتے ہوئے گزشتہ شام انگلش کرکٹ ریلیف پیکج کا جو اعلان کیا اس میں 61ملین پائونڈز کی خطیر رقم سب کیلئے مختص کردی اور پلیئرز کی 3 ما ە کی تنخواہ نہ کاٹنے کا اعلان کیا. ای سی بی کے مطابق ایگزیکٹو آفیسرز و اسٹاف کی تنخواہیں کم کی جارہی ہیں لیکن کسی سنٹرل کنٹریکٹ پلیئر کا معاوضہ کم نہیں ہوگا.
گزشتہ سال ورلڈ کپ فائنل میں نیوزی لینڈ کے خلاف سپر اوور میں مقابلہ ٹائی ہونے کے بعد متنازعہ قانون کی وجہ سے ٹائٹل اپنے نام کرنے والی انگلش ٹیم کے کھلاڑی ہوں یا ٹیسٹ میچ کھیلنے والے پلیئرز، 22 رکنی کنٹریکٹ یافتہ ورلڈ چیمپئن دستہ 3ماە کی تنخواہ کا صرف 20 فیصد تک کٹوتی پر راضی نہیں ہوا. ایسے میں ان کو کون ورلڈ چیمپئن سمجھے گا.
اس تاثر کو زائل کرنے کیلئے وکٹ کیپر جوس بٹلر کی اپنی شرٹ نیلامی کیلئے پیش کرنے کی کوشش کو بھی پذیرائی نہیں مل رہی. کرکٹ شائقین اور سوشل میڈیا صارفین نے ان ہیروز کی اس حرکت پر نا پسندیدگی ظاہر کی ہے.