انٹر نیشنل کرکٹ کونسل نے آسٹریلیا میں شیڈول ورلڈ ٹی 20 کا معاملہ جون تک موخر کرتے ہوئے خطرے سے دوچار متعدد ٹیسٹ سیریز کا حل ٹیکنیکل کمیٹی کے سپر د کردیا ہے.
جمعہ کو بورڈ میٹنگ ویڈیو کانفرنس کال کے ذریعہ ہوئی جس میں تمام بورڈ ممبران نے شرکت کی.آ ئی سی سی چیف مانو سواہنی کے مطابق کورونا کی وجہ سے ہونے والی دنیا بھر کی معطل صورتحال کا جائزہ لیا گیا اور ساتھ ہی کرکٹ پر پڑنے والے اثرات و مستقبل کے حوالے سے غوروفکرکیا گیا.
اجلاس میں اکتوبر میں آسٹریلیا میں شیڈول ورلڈ ٹی 20،ورلڈ ٹیسٹ چیمپئن شپ اور دنیا بھر میں شیڈول کرکٹ مستقبل پر بحث کی گئی. چیف ایگزیکٹو مانو سواہنی نے کہا کہ ہم حالات پر قریب سے نظر رکھے ہوئے ہیں اور اس کے مطابق فیصلے کرتے رہیں گے. ایونٹس کی ایک مقام سے دوسرے مقام منتقلی سمیت سیریز کی تاریخوں کی تبدیلی آسا ن عمل نہیں. سب اسٹیک ہولڈرز سے رابطے رکھ کر فیصلے کریں گے.
انگلینڈ میں شیڈول پاکستان اور ویسٹ انڈیز کی ٹیسٹ سیریز خطرے سے دوچار ہے. ایک بورڈ ممبر کے استفسار پر بتایا گیا کہ اگر سیریز نہ ہوسکیں تو معاملہ آئی سی سی ٹیکنیکل کمیٹی کو جائے گا کہ پوائنٹس کی تقسیم کیسے ہوگی. اس پر اعتراض ہوا کہ یہ آسا ن عمل نہیں ہے کیونکہ ایک ملک بھارت زیادہ سیریز کھیل کر ٹاپ پر ہے اور انگلینڈ 3 سیریز پیچھے ہے تو لاک ڈائون میں اس کا کیا قصور ہے. بورڈز کی اکثریت نے اتفاق کیا کہ اکتوبر کا ورلڈ ٹی 20 کپ ابھی دور ہے اس لئے اسے ابھی کوئی خطرہ نہیں ہے .جون سے معاملات بہتر ہوئے تو پلان کے مطابق ایونٹ آسٹریلیا ہی میں ہوگا اور اگر خراب ہوئے تو آئی سی سی متبادل پلان سیٹ کرے گی.
بورڈز ممبران نے آئی سی سی 2019 کی آڈٹ فنانشل اسٹیٹمنٹ کی منظوری دیدی ہے اور 2019 ورلڈ کپ کے فائنل اکائونٹ کی بھی منظوری دی ہے .
