انگلینڈ کا پورا کرکٹ سیزن خطرے میں،ورلڈ ٹی 20 بھی لپیٹ میں،آسٹریلیا کامیاب: عمران عثمانی کا ون ڈے راؤنڈ اپ

دنیا ئے سپورٹس کورونا وائرس کے حوالے سے سر پر پڑے ایونٹس منسوخ پر منسوخ کئے جارہی ہے اور یہ خیال کر رہی ہے کہ ایک ماہ تک حالات معمول پر آجائیں گے
ایسا سوچنا اچھی بات ہے اور اس کی توقع کرنا بھی حق ہے ،یہی وجہ ہے کہ آئی پی ایل 18 روز کیلئے ملتوی کی گئی ہے اور 15 اپریل سے آغاز کی نوید دی گئی ۔ اسی طرح یورپ میں جاری فٹبال لیگز 2 ہفتے کے لئے آگے کی گئیں لیکن انگلینڈ کرکٹ بورڈ نے بہت آگے کی بات کرکے خوش فہمی دور کرنے کی کوشش کی ہے.
انگلینڈ نے کورونا وائرس کی وجہ سے اپنا ڈومیسٹک کرکٹ سیزن مکمل یا اس کا بہت بڑا حصہ ملتوی کرنے کا عندیہ دیا ہے .
انگلینڈ میں اس سا ل ایسا کیا ہے کہ جس سے ورلڈ کرکٹ ہل کر رہ جائے.
جی ہاں !بہت کچھ ہے.
اگلے ماہ سے کاؤ نٹی کرکٹ کا آغاز.
ٹی 20 اور ون ڈے کپ .
جولائی میں 100 بالز فارمیٹ کا ڈیبیو ایونٹ.
ویسٹ انڈیز، پاکستان کی ٹیسٹ سیریز.
آسٹریلیا اور آئرلینڈ کی محدود اوورز کرکٹ کی سیریز.
بنگلہ دیش اور آئرلینڈ کی سیریز.
انگلینڈ کرکٹ بورڈ کورونا خوف کے سبب یہ سب کچھ یا اس میں سے بہت کچھ ختم کرنے پر ابھی سے تیاری میں ہے. خالی گراؤ نڈ کے میچز پر غور آخری آپشن ہوگا۔ اگر یہ سلسلہ چلا تو پھر ورلڈ ٹیسٹ چیمپئن شپ کے ملتوی کرنے کی مہم بھی زور پکڑ سکتی ہے.
دوسری جانب اس سال اکتوبر میں آسٹریلیا میں شیڈول ورلڈ ٹی 20 کے پلان پر بھی اس کے اثرات پڑسکتے ہیں.
**آسٹریلیا نیوزی لینڈ کیخلاف کامیاب **
آسٹریلیا کرکٹ ٹیم نے نیوزی لینڈ کیخلاف 3 ایک روزہ میچز کی سیریز کا پہلا میچ 71 رنز سے جیت لیا ہے. سڈنی کے خالی گراؤ نڈمیں میزبان ٹیم نے 7 وکٹ پر 258 رنز بنائے. ایرون فنچ اور ڈیوڈ وارنر نے 123 رنز کا آغاز فراہم کیا. وارنر نے 67اور فنچ نے 60 رنز کئے. لبوشین نے 56 رنز کئے. سودهی 3 وکٹ لیکر کامیاب رہے. کیویز 41 اوور ز میں 187 پر ڈهیر ہوگئے. مارٹن گپٹل کے 40 رنز سب سے زیادہ تھے. مار ش اور کمنز نے 3،3وکٹیں لیں.میزبان ٹیم کو چیپل ہیڈلی سیریز میں 0-1کی برتری حاصل ہوگئی ہے.
**ورلڈ کرکٹ کمیٹی کا اجلاس اور ایم سی سی کا میچ ملتوی**
ورلڈ کرکٹ کمیٹی کا کولمبو میں اس ماہ شیڈول اہم اجلاس ملتوی ہوگیا ہے. اجلاس میں ٹیسٹ کرکٹ کو 5 سے 4دن کرنے پر غور ہونا تھا. کولمبو ہی میں کائونٹی چیمپئن ایسیکس اور ایم سی سی کا 24 سے 27 مارچ تک میچ بھی کورونا وائرس کی وجہ سے منسوخ کردیا گیا ہے.