ملتان میں سب سیکرٹیریٹ جلد قائم ہو گا : وزیر اعلی بزدار کی خواجہ جلال الدین رومی سے ملاقات

لاہور : وزیر اعلی پنجاب سردار عثمان بزدار نے کہا ہے کہ جنوبی پنجاب کے عوام کی سہولت کے لئے ملتان میں‌سب سیکرٹیریٹ دفاتر جلد قائم ہوں گے۔ان خیالات کا اظہار انہوں نے سابق صدر چمبرز آف کامرس ملتان و ڈیرہ غازی خان خواجہ جلال الدین رومی سے خصوصی ملاقات میں کیا ۔
انہوں نے کہا ہماری حکومت اپنے وعدے کے مطابق جنوبی پنجاب میں صاف پانی ۔تعیلمی سہولیات اور کاروباری سر گرمیوں کے فروغ کے لئے دن رات کوشاں ہے۔ اس سلسلہ میں ڈیرہ غازی خان میں آنے والے مالی سال میں کارڈیالوجی ہسپتال کی تعمیر کا آغاز ہو گا جبکہ نشتر ٹو ملتان کی تعمیر تیزی سے جاری ہے جو 2022 تک مکمل ہو جائے گا۔
اس موقعہ پر خواجہ جلال الدین رومی نے وزیراعلی پنجاب کو جنوبی پنجاب میں کاروباری سرگرمیوں کے پھیلاؤ کے لئے نئے انڈسٹریل ایریا کے قیام کی تجویز دی۔جسے انہوں نے منظور کرتے ہوئے کہا کہ آنے والے دنوں میں یہ علاقہ کاروباری سرگرمیوں کے فروغ میں اہم کردار ادا کرے گا ۔ وزیر اعلی پنجاب سردار عثمان بزدار نے خواجہ جلال الدین رومی کی جنوبی پنجاب میں صاف پانی کی فراہمی اور ملتان شہر میں باغات کی اپ گریڈیشن اورسرکاری ہسپتالوں میں ادویات کی فراہمی کے اقدامات کو سراہا کہ ایسے منصوبے کی وجہ سے جہاں عام آدمی کی مشکلات میں کمی آرہی ہے وہاں پر حکومتی رٹ بھی مضبوط ہو رہی ہے اس موقعہ پر خواجہ جلال الدین رومی نے انھیں ملتان کے دورے کی دعوت دی جس کو انہوں قبول کرتے ہوئے کہا وہ جلد ملتان آ کر عوامی خدمات کے منصوبوں کا سنگ بنیاد رکھیں گے۔