ملتان: معروف روحانی شخصیت،گردیزی خاندان کے سربراہ اور خانقاہ حضرت شاہ یوسف گردیز کے سجادہ نشین الحاج مخدوم سید محمد راجو شاہ گردیزی طویل علالت کے بعد سوموار کے روز انتقال کرگئے۔ ان کی عمر85برس تھی۔
راجو شاہ گردیزی کو خاندان کے علاوہ سیاسی ،سماجی و مذہبی حلقوں میں بھی احترام کی نظر سے دیکھا جاتاتھا۔ وہ ایک روحانی شخصیت کے طورپر جانے جاتے تھے۔ وہ سیاست سے ہمیشہ دور رہے ۔ جنرل ضیاءالحق کے دور میں راجو شاہ گردیزی کو مجلس شوری میں شمولیت کی دعوت بھی دی گئی لیکن انہوں نے اپنے چھوٹے بھائی احمد نوازگردیزی کو اس رکنیت کے لیے نامزد کیا۔ان کے انتقال کی خبر بہت دکھ اور صدمے کے ساتھ سنی گئی۔
راجو شاہ گردیزی کے انتقال کی خبر ملتے ہی گردیزی خاندان کے افراداور عقیدت مندوں کی بڑی تعداد شاہ گردیز پہنچ گئی۔ان کی نماز جنازہ 3فروری کو آٹھ بجے شب خانقاہ حضرت شاہ یوسف گردیز میں ادا کی جائے گی اورانہیں مزار کے احاطے میں سپردخاک کیا جائے گا۔
