خیبر پختونخوا اور بلوچستان میں بارشوں سے متعلقہ حادثات کے نتیجے میں 32 ہلاکتیں

پشاور / کوئٹہ ۔۔ پاکستان کے صوبوں خیبر پختونخوا اور بلوچستان میں بارشوں اور سیلابی ریلوں کے باعث 32 افراد ہلاک ہوئے ہیں۔
خیبر پختونخوا میں قدرتی آفات سے نمٹنے کے صوبائی ادارے پی ڈی ایم اے نے بتایا ہے کہ 25 مارچ سے اب تک بارشوں اور متعلقہ حادثات کے نتیجے میں مجموعی طور پر 25 افراد ہلاک اور 77 زخمی ہوئے ہیں۔ ہلاک افراد میں 18 بچے، پانچ خواتین اور دو مرد شامل ہیں۔
پی ڈی ایم اے کے مطابق اب تک 88 گھروں کو نقصان پہنچا، جن میں 71 جزوی جبکہ 17 مکمل طور پر منہدم ہو چکے ہیں۔ یہ واقعات بنوں، ایبٹ آباد، کوہاٹ، پشاور اور نوشہرہ سمیت مختلف اضلاع میں پیش آئے۔
دوسری جانب بلوچستان کے مختلف علاقوں میں حالیہ بارشوں اور سیلابی ریلوں کے نتیجے میں ہلاکتوں کی تعداد سات ہو چکی ہے جبکہ متعدد اضلاع میں درجنوں مکانات اور فصلوں کو نقصان پہنچا ہے۔
پی ڈی ایم اے بلوچستان کے مطابق آواران، چمن اور بارکھان سمیت 19 اضلاع میں بارشیں ریکارڈ کی گئیں۔ حکام کے مطابق قلعہ عبداللہ، کچھی، کیچ اور ہرنائی میں زیادہ بارش کے باعث ندی نالوں میں طغیانی آئی۔
پی ڈی ایم اے کا کہنا ہے کہ ضلع کچھی میں دریائے ناڑی کے پشتے میں شگاف پڑنے سے 100 سے زائد مکانات منہدم اور 400 ایکڑ زرعی اراضی زیر آب آ گئی، جبکہ 50 سے زائد مویشی ہلاک ہوئے۔ اس کے علاوہ ضلع کیچ کے علاقے بھگدر اور قلعہ عبداللہ کے علاقے ارمبی کاکوزئی میں بھی 50 سے زائد گھروں کو نقصان پہنچا۔
( بشکریہ : بی بی سی ۔۔ )