ملتان : اے پی پی ۔ ناقص تفتیش اور گواہوں کے منحرف ہوجانے کے باعث رواں برس کے دوران گزشتہ تین ماہ (مئی ،جون،جولائی)میں جنسی زیادتی کے 65مقدمات میں سے کسی ایک میں بھی کسی ملزم کو سزانہیں ہوسکی۔ مقامی کرائم رپورٹر حسیب اعوان کے مطابق سال 2022ءمیں ایسے 353مقدمات کے 323ملزمان بری ہوگئے تھے۔ لوک سجاگ میں شائع ہونے والی رپورٹ میں کہا گیا ہے کہ جنوری 2023ءمیں ریپ کے 30مقدمات کافیصلہ ہوا جن میں سے ایک ملزم کو عمرقید کی سزا ہوئی ۔29مقدمات میں گواہوں کے منحرف ہونے کے باعث ملزمان بری ہوگئے۔ فروری میں 29مقدمات میں 2ملزمان کوسزائے موت ،ایک کو قید اور جرمانہ ہوا ،26بری کردیئے گئے۔ اپریل 2023ءمیں ایک ملزم کوعمرقید ہوئی ،22بری کردیئے گئے ۔جون کے مہینے میں 28میں سے 9ملزمان رہا ہوگئے اورجولائی میں 13مقدمات کے تمام ملزمان بری ہوگئے۔ ڈپٹی ڈسٹرکٹ پبلک پراسیکیوٹر نذرحسین ٹانگرہ نے اس حوالے سے بات چیت کرتے ہوئے بتایا کہ صنفی تشدد کی روک تھام کے لیے کوششیں کی جارہی ہیں ۔انہوں نے کہاکہ ناقص تفتیش ملزمان کی بریت کاباعث بنتی ہے۔میڈیکل رپورٹ میں تاخیر اورغلطیاں بھی عدالتوں سے ریلیف کاباعث بن جاتی ہیں۔انہوں نے مزید کہاکہ اینٹی ریپ آرڈیننس 2020ءکے بعد سخت اورفوری فیصلے متعارف کرائے گئے اور بروقت فرانزک اور ڈی این اے ٹیسٹ کویقینی بنایاجارہاہے۔
