پابندیاں مستر د :ملک بھر میں یوم علیؓ کے جلوس برآمد ، لاکھوں افراد مساجد میں اعتکاف بیٹھ گئے

لاہور / کراچی: مساجد میں اعتکاف بیٹھنے پر عائد پابندی کا تو حکومت نے نوٹیفکیشن جاری کر دیا ہے لیکن علما نے پابندی کو مسترد کر دیا ہے اور لاکھوں افراد اعتکاف بیٹھ گئے ہیں۔اسی طرح یوم علیؓ کے جلوسوں پرپابندی بھی نظر انداز کر دی گئی ۔ مساجد کے منتظمین کا کہنا ہے کہ کورونا ایس اوپیز کے تحت چارسے پانچ افراد اعتکاف بیٹھے ہیں، این سی اوسی کی طرف سے اعتکاف ، رمضان المبارک کے آخری عشرہ کی طاق راتوں اورجمعۃ الوداع کے حوالے سے ایس اوپیز بھی جاری کئے گئے ہیں۔
بچے، پچاس سال سے زائدعمرکے بزرگ اوربیمار افراد اعتکاف نہیں بیٹھ سکتے ہیں، اعتکاف کو دوران معتکفین اجتماعی سحری اورافطاری سے گریزکریں گے، اور نمازی گھروں سے وضوکرکے آئیں، معتکفین اللہ کے حضور توبہ و استغفار اورکورونا وبا سے نجات کے لئے خصوصی دعا مانگیں گے۔
یوم علیؓ کے جلوس بھی ملک بھر میں جاری ہیں ۔ اندرون لاہور میں یوم شہادت حضرت علی کرم اللہ وجہہ کا مرکزی جلوس رات گئے مبارک حویلی سے برآمد ہو ا، یہ جلوس اپنے مقررہ راستوں سے ہوتا ہوا صبح کے وقت کربلا گامے شاہ پہنچ کر اختتام پذیر ہو ا۔ْ
جلوس کے موقع پر سکیورٹی کے سخت انتظامات کیے گئےتھے ، جلوس کے ساتھ ساتھ پولیس کی بھاری نفری بھی موجودتھی ، جلوس کے راستوں کی جانب کھلنے والی تمام گلیاں اوربازار خاردار تاریں اور قناتیں لگا کر بند کیے گئے ہیں۔
کراچی میں یوم علیؓ کی مرکزی مجلس نشترپارک میں منعقد ہوئی جس سے علامہ شہنشاہ حسین نقوی نے خطاب کیا اور فضائل حضرت علیؓ بیان کیے۔
مجلس کے بعد یوم علیؓ کا مرکزی جلوس نشترپارک سے بوتراب اسکاؤٹس کی قیادت میں برآمد ہوا جو اپنے روایتی راستوں، نمائش چورنگی، سی بریز پلازہ، صدر، ریگل چوک، تبت سینٹر، ریڈیو پاکستان سے ہوتا ہواکھارادر میں امام بارگاہ حسنیہ ایرانیان پر اختتام پزیر ہوگا۔ مرکزی جلوس کی سکیورٹی کے لیے پولیس اور رینجرز کی بھاری نفری تعینات ہے جب کہ جلوس کے راستوں میں آنے والی گلیوں اور سڑکوں کو کنٹینرز لگا کر سیل کیا گیا ہے، جلوس کی گزرگاہ میں آنے والی دکانوں اور مارکیٹوں کو بھی سیل کیا گیا ہے۔
اس کے علاوہ کوئٹہ میں یوم علیؓ کی مناسبت سے ہزارہ ٹاؤن میں جلوس نکالا گیا ،اس موقع علاقے کومکمل سیل کر دیا گیا پولیس اور ایف سی کی بھاری نفری تعینات رہی۔
( بشکریہ : جیو نیوز )