مستونگ : یونیورسٹی آف گوادر کے وائس چانسلر اور پرو وائس چانسلر سمیت چاروں اہلکار اتوار کے روز بازیاب ہو گئے ہیں۔
محکمہ داخلہ بلوچستان کے معاون برائے میڈیا بابریوسفزئی نے بازیابی کی تصدیق کرتے ہوئے بتایا کہ چاروں افراد ضلع مستونگ کے علاقے کردگاپ سے بازیاب ہو گئے ہیں تاہم انھوں نے اس حوالے سے زیادہ تفصیلات فراہم نہیں کیں۔
یونیورسٹی کے وائس چانسلر پروفیسر ڈاکٹر عبدالرزاق صابر کے اہلخانہ نے بتایا کہ وہ اپنے گھر پہنچ گئے ہیں جبکہ باقی لوگ بھی بحفاظت بازیاب ہو گئے ہیں۔
گوادر یونیورسٹی کے چانسلر ڈاکٹر عبدالرزاق صابر، پرو وائس چانسلر پروفیسر ڈاکٹر سید منظور احمد، پرسنل سٹاف آفیسر ڈاکٹر ارشاد احمد بلیدی اور ڈرائیور حاتم بدل 13 مئی کو گوادر سے کوئٹہ جاتے ہوئے لاپتہ ہو گئے تھے۔
اگرچہ سرکاری حکام نے ان کے اغوا کے حوالے سے امکان کو مسترد نہیں کیا تھا لیکن کسی گروپ کی جانب سے اس کی ذمہ داری قبول نہیں کی گئی تھی۔
ان اساتذہ کے لاپتہ ہونے کے دو روز بعد، 16 مئی کو نامعلوم مسلح افراد نے فائرنگ کر کے نوشکی میں ایک اسسٹنٹ پروفیسر کو قتل کر دیا تھا۔
اساتذہ کے اغوا اور اس کے بعد نوشکی میں اسسٹنٹ پروفیسر کے قتل کے واقعات سے تعلیمی برادری میں تشویش کی لہر دوڑ گئی تھی جبکہ اساتذہ تنظیموں نے حکومت سے سکیورٹی فراہم کرنے کا مطالبہ کیا تھا۔
