لندن:ایک ایسی ٹیکنالوجی سامنے آئی ہے جس کی مدد سے آپ اپنے قدموں سے بھی بجلی پیدا کر سکتے ہیں۔
جی ہاں واقعی برطانیہ سے تعلق رکھنے والی ایک کمپنی Pavegen نے یہ ٹیکنالوجی تیار کی ہے۔
اس مقصد کے لیے کمپنی کی جانب سے ٹائلوں میں الیکٹرو میگنیٹک جنریٹر کا استعمال کیا گیا ہے جس سے پیروں کی حرکت سے بجلی پیدا ہوتی ہے۔
متحدہ عرب امارات میں ورلد فیوچر انرجی کانفرنس کے موقع پر اس ٹیکنالوجی کا مظاہرہ کیا گیا۔
اس موقع پر کمپنی کی جانب سے بتایا گیا کہ ہر ٹائل کے نیچے ایک الیکٹرو میگنیٹک جنریٹر ہوتا ہے اور جب آپ اس پر قدم رکھتے ہیں تو پیروں کی حرکت سے وہ جنریٹر متحرک ہوتا ہے۔
کمپنی کے مطابق اس توانائی کو بجلی میں تبدیل کیا جا سکتا ہے۔
اس نے بتایا کہ اگرچہ ٹائلز سے بہت کم توانائی پیدا ہوتی ہے مگر اس سے اسٹریٹ لائٹس کو روشن اور چھوٹی ڈیوائسز کو چارج کیا جا سکتا ہے۔
Pavegen کی ٹائلز کو واشنگٹن میں ایک جگہ ایل ای ڈی لائٹس کو روشن کرنے کے لیے استعمال کیا جا رہا ہے جبکہ برطانیہ میں بھی مختلف جگہوں پر انہیں نصب کیا گیا ہے تاکہ مانیٹرز اور موبائل فون چارجنگ اسٹیشنز کو بجلی فراہم کی جا سکے۔
کمپنی کے بانی لارنس کیمبل کک کے مطابق ٹائلز پر چلنے سے پیدا ہونے والی توانائی بیٹری یا کسی ڈیوائس میں منتقل کی جاسکتی ہے۔
ان کا کہنا تھا کہ اب تک ان ٹائلز کو 37 سے زائد ممالک میں لگایا جا چکا ہے جبکہ قدموں کے ڈیٹا کو بھی مختلف گیمز کی تیاری کے لیے استعمال کیا جاسکتا ہے۔
یہ کمپنی سولر پلس کے نام سے ایک ایسا ٹائل سسٹم بھی تیار کر رہی ہے جو شمسی توانائی اور قدموں سے پیدا ہونے والی توانائی کا امتزاج ثابت ہوگا۔
کمپنی یہ سولر ہائبرڈ ٹائلز رواں سال موسم گرما میں متعارف کرانے کی خواہشمند ہے۔
(بشکریہ:جیونیوز)
