آئی سی سی مینز ٹی ٹوئنٹی ورلڈکپ کے پہلے سپر اوور میں نمیبیا نے عمان کو 11 رنز سے شکست دے دی۔
ٹی ٹوئنٹی ورلڈکپ کے تیسرے میچ میں عمان اور نمیبیا کا میچ برابر ہوگیا جس کے بعد فیصلہ سپر اوور میں ہوا۔
سپر اوور:
نمیبیا کی جانب سے سپر اوور میں بیٹنگ کرنے آل راؤنڈر ڈیوڈ ویزا اور کپتان گرہارڈ ایراسمس آئے، عمان کی جانب سے بولنگ بلال خان نے کروائی۔
ویزا نے پہلی گیند پر چوکا اور پھر دوسری پر چھکا لگایا، اس کے بعد تیسری گیند پر دو جب کہ چوتھی پر ایک رن لیا۔
پانچویں اور چھٹی گیند پر کپتان ایراسمس نے دو چوکے لگائے اور یوں 21 رنز بنے اور سپر اوور میں عمان کو جیت کے لیے 22 رنز کا ہدف ملا۔
گروپ بی میں شامل دونوں ٹیمیں برج ٹاؤن میں مدمقابل ہیں، جہاں نمیبیا نے عمان کے خلاف ٹاس جیت کر بولنگ کا فیصلہ کیا تھا، پہلے بیٹنگ کرتے ہوئے عمان کی ٹیم نے 19.4 اوورز میں 109 رنز اسکور کیے اور نمیبیا کو 110 رنز کا ہدف دیا۔
عمان کی جانب سے بیٹنگ کے لیے عاقب الیاس اور نسیم خوشی آئے جب کہ نمیبیا کی طرف سے ڈیوڈ ویزا نے بولنگ کروائی، نسیم خوشی 2 رنز بناکر آؤٹ ہوگئے جس کے بعد ذیشان مقصود آئے۔
عاقب الیاس 7 اور ذیشان ایک رن بناسکے، اور یوں عمان سپر اوور میں 10 رنز ہی بناسکا۔
پہلی اننگز
اننگز کی پہلی گیند پر عمان کے اوپننگ بیٹر کیشپ پرجاپتی ٹرمپلمین کی گیند پر ایل بی ڈبلیو ہو کر پویلین روانہ ہوگئے تھے جبکہ ٹرمپلمین نے اپنی پہلے ہی اوور کی دوسری گیند پر عمان کے کپتان عاقب الیاس کو بھی پویلین کی راہ دکھا دی۔
عمان کی جانب سے خالد کیل39 گیندوں پر 34 رنز بنا کر نمایاں رہے، جبکہ ذیشان مقصود 20 گیندوں پر 22 رنز اور ایان خان 21 گیندوں پر 15 رنز اسکور کر پائے۔
عمانی بلے باز کلیم اللہ نے 9 گیندوں پر 11 رنز اسکور کیے جبکہ کوئی اور بیٹر ڈبل فگر میں داخل نہ ہوسکا۔
پہلی اننگز میں بولنگ کرتے ہوئے نمیبیا کے ٹرمپلمین 4 اوورز میں 21 رنز دیکر 4 وکٹیں حاصل کرنے میں کامیاب ہوئے، ڈیوڈ ویسے نے 3، گرہارڈ 2 اور برنارڈ شولز نے ایک وکٹ حاصل کی۔
دوسری اننگز
دوسری اننگز میں عمان کے خلاف نمیبیا نے مقررہ 20 اوورز میں 6 وکٹوں کے نقصان پر 109 رنز اسکور کیے۔
برج ٹاؤن میں کھیلے گئے اس میچ میں نمیبیا کی پلیئنگ الیون میں کپتان گرہارڈ ایراسمس،نیکولاس ڈیون، مائیکل وین لنجین، جین فریلنک، میلن کروگر، وکٹ کیپر زین گرین، جے جے سمٹ، ڈیوڈ ویسے، روبن ٹرمپلمین اوربرنارڈ شولز سمیت ٹینگینی لنگیمنی شامل ہیں۔
کپتان عاقب الیاس کی قیادت میں عمان کی ٹیم میں نسیم خوشی، ذیشان مقصود، خالد کیل، ایان خان، محمد ندیم، مہران خان، شکیل احمد، کلیم اللہ، کیشپ پرجاپتی اور بلال خان شامل ہیں۔
(بشکریہ:جیونیوز)
