شاہکارکتابوں کے پبلشر اورانسائیکلوپیڈیا پاکستانیکا کے خالق سید قاسم محمود کی14ویں برسی31مارچ کومنائی جائے گی

لاہور:نامور دانشور ،افسانہ نگار ،پبلشر اور” انسائیکلوپیڈیا پاکستانیکا“ کے خالق سید قاسم محمود کی14ویں برسی 31مارچ کو منائی جارہی ہے۔ سید قاسم محمود نے کتاب دوستی کے فروغ کے لیے بے پناہ خدمات انجام دیں۔
وہ17نومبر 1928ءکوضلع ہریانہ میں پیدا ہوئے۔قاسم محمود کا اصل نام سید قاسم علی شاہ تھا۔1940ءمیں قاسم محمود نے پرائمری کے امتحان میں پورے پنجاب میں پہلی پوزیشن حاصل کی۔1946ءمیں میٹرک کے بعد انہوں نے ہمدرد دواخانہ دہلی میں حکیم سعید کے پاس ملازمت اختیار کی۔قیام پاکستان کے بعد وہ لاہور آگئے اور محنت مزدوری کرتے رہے۔1950ءمیں انہیں پنجاب یونیورسٹی میں ملازمت مل گئی۔سید قاسم محمود نے اردوزبان و ادب اور کتاب کے فروغ کے لیے گراں قدرخدمات انجام دیں۔
1970ءکے عشرے میں انہوں نے سائنس میگزین کا اجراءکیا اور قسط وار انسائیکلوپیڈیا پاکستانیکا کی اشاعت شروع کی۔وہ شاہکار کے نام سے ہرماہ کم قیمت پر کتابیں بھی شائع کیا کرتے تھے۔قاسم محمود نے مختلف اخبارات اور جرائد میں ادارت کے فرائض انجام دیئے۔
90ءکے عشرے میں” انسائیکلوپیڈیا پاکستانیکا “کتابی صورت میں شائع ہوا جس کے بعد2000ءمیں انہوں نے سیرت النبیﷺ پر انسائیکلوپیڈیا کی اشاعت کے لیے بھی کام شروع کردیا۔یہ انسائیکلوپیڈیاان کی وفات کے بعد 2014ءمیں شائع ہوا۔31مارچ2010ءکو سید قاسم محمود گردوں کے عارضے کے باعث لاہور میں انتقال کرگئے۔