ملتان ( گردو پیش نیوز ) سلسلہ ادریسیہ محمدیہ امینیہ کے روحانی پیشوا الشیخ حافظ محمد امین بن عبدالرحمان کی نماز جنازہ آج بروز جمعرات24اگست2023کو بعد نماز مغرب جامع مسجد الحافظ الشیخ محمد امین بن عبدالرحمن 381اے بلاک شاہ رکن عالم کالونی ملتان میں ادا کی جائے گی ۔ ان کا بدھ کی شب لا ہور میں انتقال ہو گیا تھا ۔ حافظ محمد امین کے پاکستان ، یورپ ،امریکہ، افریقہ‘، عرب ممالک اور خلیجی ریاستوں سمیت دنیا بھر میں کروڑوں مریدین ہیں۔حضرت الشیخ حافظ محمد امین بن عبدالرحمان کے ہاتھ پر سینکڑوں لوگوں نے اسلام قبول کیا ۔
الشیخ حافظ محمد امین بن عبدالرحمان کی وفات پر ملکی و غیر ملکی اہم شخصیات نے اظہار افسوس کیا ہے۔ان کی نماز جنازہ میں شرکت کے لیے پاکستان سمیت دنیا بھر سے سیکڑوں افراد ملتان پہنچ چکے ہیں ۔اس وقت ملتان کے تمام ہوٹل بک ہو چکے ہیں جہاں شیخ امین کے جنازے میں شرکت کے لیے آنے والے مقیم ہیں اسی طرح ملتان سے ٹرینوں اور بسوں کی بھی تمام سیٹیں اگلے دو روز کے لیے بک ہو چکی ہیں ۔ نیو ملتان میں شیخ امین کی رہائش گاہ کے ارد گرد تمام سڑکوں پر لوگوں کا ہجوم ہے اور تل دھرنے کی جگہ نہیں ہے
نماز جنازہ کے موقع پر سکیورٹی کے سخت انتظامات کیے گئے ہیں ۔ ٹریفک پولیس ملتان کے مطابق شاہ رکن عالم کالونی میں نماز جنازہ کی وجہ سے ٹریفک کو جناح پارک سے مدنی چوک تک ٹریفک کے لیے بند کیا گیا ہے۔وہاڑی چوک سے آنیوالی ٹریفک کو جناح پارک سے ٹی چوک ، ن چوک سے گلشن مارکیٹ جناح چوک کی طرف موڑ دیا گیا ہے، جس وجہ سے وہاڑی چوک سے جناح پارک تک ٹریفک کا غیر معمولی دباؤ رہے گا۔