پاکستان کی ترقی و خوشحالی کیلیے ہماری کوششوں کے مثبت نتائج آنا شروع ہو گئے ہیں، وزیراعظم

اسلام آباد: وزیراعظم شہباز شریف نے کہا ہے کہ مختصر عرصے میں پاکستان کی ترقی و خوشحالی کیلیے ہماری کوششوں کے مثبت نتائج آنا شروع ہو گئے ہیں۔ اللہ کے فضل و کرم سے ملکی معیشت استحکام کی طرف گامزن ہے۔
یوم آزادی کے موقع پر قوم کے نام اپنے پیغام میں وزیراعظم نے کہا کہ میں ملک بھر کے عوام اور بیرون ملک مقیم پاکستانیوں کو دل کی اتھاہ گہرائیوں سے مبارکباد پیش کرتا ہوں۔ آج کے دن مجھ سمیت پوری قوم اپنے آباؤاجداد اور تحریک پاکستان کے اُن لاتعداد گمنام ہیروز کی بے پناہ قربانیوں کو خراج عقیدت پیش کرتی ہے، جنہوں نے جنوبی ایشیا میں کروڑوں مسلمانوں کے لیے ایک آزاد مملکت، جہاں وہ اپنے عقائد اور اقدار کے مطابق زندگی گزار سکیں، کے قیام کے لیے انتھک جدوجہد کی۔
مملکت خداداد پاکستان علامہ محمد اقبال کے تصور کے عین مطابق 14 اگست 1947 کو قائداعظم محمد علی جناح کی غیر متزلزل اور ثابت قدم قیادت اور ہمارے اسلاف کی بے مثال قربانیوں کے نتیجے میں دنیا کے نقشے پر ایک آزاد اور خودمختار ملک کے طور پر ابھرا۔
انہوں نے کہا کہ پاکستان کے بانیوں کی بے لوث اور مسلسل جدوجہد کی بدولت پاکستان ان کٹھن مشکلات سے نبرد آزما ہوا جن کا اسے ابتدائی مرحلے میں سامنا تھا۔ گزشتہ کئی دہائیوں کے دوران پاکستان نے اہم سنگ میل عبور کیے ہیں۔ قدرتی آفات اور معاشی و سماجی مشکلات کے ذریعے پاکستانی قوم کی ہمت اور استقامت کا امتحان لیا گیا ہے، اس کے باوجود پاکستان کی غیور و بہادر قوم کے عزم اور اتحاد کا جذبہ ہمیشہ غالب رہا ہے۔
میں پاکستان کی ترقی اور خوشحالی میں ہمارے بیرونِ ملک مقیم پاکستانیوں کے کلیدی کردار کو بھی سراہتا ہوں۔ اگرچہ آپ پاکستان میں اپنے گھروں سے ہزاروں میل دور ہیں لیکن آپ اس ملک کا ایک ایسا حصہ ہیں جس کی اہمیت کبھی ماند نہیں پڑ سکتی۔ مجھ سمیت پوری قوم کو آپ کی محنت اور کامیابیوں پر فخر ہے اور ہم آپ کو پاکستان کے حقیقی سفیر مانتے ہیں کیونکہ آپ جہاں کہیں بھی ہوں دنیا کے سامنے پاکستان کا مثبت تاثر قائم کرنے میں اپنا کردار ادا کررہے ہیں۔
یوم آزادی کے اس موقع پر میں اپنی مسلح افواج کا شکریہ ادا کرتا ہوں، جو ہماری سرحدوں اور خودمختاری کی حفاظت کرتی ہیں۔ افواجِ پاکستان کی لازوال قربانیاں، فرض کی ادائیگی کیلیے سچی لگن اور وطن کی حفاظت کیلیے ہر قسم کی قربانی دینے کا جذبہ انتہائی احترام اور تعریف کے مستحق ہیں۔
جب ہم اپنی آزادی کا جشن مناتے ہیں، تو ہم غیر قانونی طور پر بھارت کے زیر تسلط جموں و کشمیر (IIOJK) اور فلسطین کے بہادر اور غیور کشمیری بہن بھائیوں کو بھی یاد کرتے ہیں جو سات دہائیوں سے اپنے حق خودارادیت کے لیے لڑ رہے ہیں اور بدترین بھارتی ریاستی ظلم کا سامنا کر رہے ہیں۔
پاکستان، غیر قانونی طور پر بھارت کے زیرِ تسلط جموں و کشمیر کے عوام کی اس وقت تک مکمل اخلاقی، سیاسی اور سفارتی حمایت جاری رکھے گا جب تک وہ اپنا بنیادی حق، حق خود ارادیت حاصل نہیں کر لیتے۔ پاکستان صہیونی ظلم و جبر کے شکار نہتے فلسطینیوں کی بھی ان کے جائز حقوق کے حصول تک حمایت جاری رکھے گا۔
پاکستان آج ایک دوراہے پر کھڑا ہے۔ اگرچہ مشترکہ اقدار، بھرپور ثقافتی ورثہ اور متنوع روایات ہمیں ایک دوسرے کے ساتھ باندھے ہوئے ہیں، ہماری معیشت کو افراط زر، توانائی کی بڑھتی ہوئی قیمتوں، بے روزگاری اور قرضوں کے بوجھ کی شکل میں متعدد مشکلات کا سامنا ہے۔
فروری 2024 کے انتخابات کے بعد اقتدار سنبھالنے کے بعد سے، ہماری مسلسل توجہ پاکستان کی اقتصادی ترقی اور معاشی استحکام پر مرکوز ہے۔ پاکستان کے وسیع قدرتی وسائل کے ذخائر اور نوجوان افرادی قوت ہمارا حقیقی اثاثہ اور سب سے بڑی طاقت ہیں۔ ہم ان وسائل سے بھرپور فائدہ اٹھانے اور وسیع پیداواری استعداد کے حامل شعبوں میں سرمایہ کاری کو راغب کرنے کے لیے اقدامات کر رہے ہیں جس سے روزگار کے مواقع پیدا ہوں گے، صنعت کاری کی رفتار تیز ہو گی اور ملک میں معاشی خوشحالی آئے گی۔
ہماری حکومت کی اولین ترجیحات میں بین الاقوامی معیار کی تعلیم اور ہنر کی فراہمی بھی شامل ہیں جو نہ صرف ہمارے نوجوانوں کو مزید بااختیار بنائے گی بلکہ انہیں مسابقتی عالمی معیشت میں برتری میں معاونت کرے گی۔ پاکستان کے پورے ایکو سسٹم کو ڈیجیٹائز کرنے اور ٹیکس کی بنیاد کو وسیع کرنے کی قومی مہم کی میں بذاتِ خود نگرانی کر رہا ہوں تاکہ ایسے لوگ جو بروقت ٹیکس ادا کرتے ہیں انہیں زیادہ سے ذیادہ ریلیف فراہم کیا جا سکے۔
وزیراعظم نے کہا کہ مختصر عرصے میں پاکستان کی ترقی و خوشحالی کیلیے ہماری کوششوں کے مثبت نتائج آنا شروع ہو گئے ہیں۔ اللہ کے فضل و کرم سے ملکی معیشت استحکام کی طرف گامزن ہے۔ افرطِ زر کی شرح 38 فیصد سے کم ہو کر 11.1 فیصد (جولائی) پر آ گئی ہے اور جلد ہی اسے سنگل ڈیجٹ پر لایا جائے گا، انشاء اللہ!
انہوں نے کہا کہ ہم بجلی کی قیمتوں میں کمی لانے کے لیے بھرپور کوشش کر رہے ہیں اور قوم جلد نتائج دیکھے گی۔
وزیراعظم نے اپنے پیغام میں کہا کہ مجھے یقین ہے کہ شبانہ روز محنت سے ہم اپنے شہریوں کی ترقی و خوشحالی کے لیے متحد ہوکر اپنا سفر جاری رکھیں گے۔ اپنی تمام تر توانائیوں اور مشترکہ کوششوں سے ہم سب ایک ایسے ترقی یافتہ اور خوشحال پاکستان کے لیے کام کریں گے جس کا تصور پاکستان کے بانیوں نے ہمارے اور ہماری نسلوں کے لیے پیش کیا تھا۔
یوم آزادی مبارک ہو!
(بشکریہ:ایکسپریس نیوز)